Қасым-Жомарт Тоқаев Ақордада Рим папасы Францискпен кездесті. Бұл туралы Ақорда хабарлады.
Кездесу алдында понтификті Президент сарайында ресми қарсы алу рәсімі болды. Құрмет қарауылы ротасының бастығы рапорт бергеннен кейін екі елдің мемлекеттік әнұраны шырқалды. Қасым-Жомарт Тоқаев пен Рим папасы Құрмет қарауылының алдынан өтіп, екіжақты келіссөз жүргізу үшін «Шығыс» залына барды.
Қасым-Жомарт Тоқаев Католик шіркеуінің басшысына ілтипат көрсете отырып, Қазақстанға келгені үшін ризашылығын білдірді.
Сіздің Қазақстанға, жалпы айтқанда, Орталық Азия аймағына алғашқы апостолдық сапарыңыз менің отандастарымды қай дінді ұстанатынына қарамастан зор қуанышқа бөледі. Сіздің бұл сапарыңызды қайырымдылық пен әділдік жолындағы рухани көшбасшылықтың жарқын үлгісі ретінде бағалаймын. Қасиетті Иоанн Павелдің Қазақстанға жасаған тарихи сапары 2001 жылы қыркүйекте, сол жылғы 11 қыркүйекте бүкіл әлемді ауыр күйзеліске түсірген АҚШ-тағы террорлық актіден кейін болды. Оның символдық мәні зор еді,
деді мемлекет басшысы.
Президент Рим папасының сапары халықаралық аренадағы жағдайдың шиеленісуі мен әлемдегі ауыр геосаяси ахуал аясында өтіп жатқанына назар аударды.
Қасым-Жомарт Тоқаев Католик шіркеуі басшысының Қазақстанға келуі және оның Әлемдік және дәстүрлі діндер көшбасшылары съезіне қатысуы өте маңызды оқиға екенін айтып өтті. Президенттің айтуынша, Рим папасы бейбітшілік пен өзара түсіністікке шақыратын бастамаларға себепші болуы мүмкін.
Өзара сенім мен құрмет көрсету жағдайында өткен кездесуде мемлекет басшысы мен Рим папасы конфессияаралық келісім мен дінаралық диалогты, Қазақстан мен Ватикан арасындағы ынтымақтастықтың даму перспективаларын ілгерілетудің өзекті мәселелерін талқылады және қазіргі заманның сын-қатерлері жөнінде пікір алмасты.
