Премьер-министрдің орынбасары — сауда және интеграция министрі Бақыт Сұлтанов пен ауыл шаруашылығы министрі Ербол Қарашөкеев президент сынына қатысты пікір білдірді. Бұл туралы Tengrinews.kz хабарлады.
Сұрақтар әділ болды. Сын өте орынды айтылды. Осы бағытта жұмыс істеп жатырмыз. Қызметіміздің тиімділігін арттыру бойынша міндет қойылды. Ауыл шаруашылығы министрлігімен шаралар әзірледік. Сіздердің де, мемлекет басшысының да алдында баяндаймыз»,
деді Бақыт Сұлтанов ОКҚ брифингісінде.
Ауыл шаруашылығы министрі Ербол Қарашөкеев те осындай пікір білдірді.
Мемлекет басшысы жариялаған сөгісі әділ болды. Жұмысымызда кемшіліктер болғанын білеміз. Өз баяндамамда қант нарығында объектив және субъектив факторлар болғанын көрсеттім. Қазір оны түзету әрі жұмыс тиімділігін арттыру үшін барлық қажет шараны қолданып жатырмыз,
деді министр.
Еске салайық, бұған дейін Қасым-Жомарт Тоқаев премьер-министрдің орынбасары — сауда және интеграция министрі Бақыт Сұлтанов пен ауыл шаруашылығы министрі Ербол Қарашөкеевке сөгіс жариялаған еді.
