Президенттікке үміткер Қарақат Әбден өзінің Facebook парақшасында видео жариялап, қазақстандық жастарды Хэллоуин мерекесін тойламауға шақырды.
Айтуынша, біз өз дәстүрлі мерекелерімізді көбірек насихаттап, Хэллоуин сияқты мерекелерге мемлекеттік деңгейде тыйым салуымыз керек.
Кешеден бері Сеулде болған оқиғаны оқып, көріп жатқан шығарсыздар. 150-ден астам адам қайтыс болды, оның ішінде біздің қазақтың қаршадай қызы бар екен. Ата-анасы бекем болсын,
деп бастады сөзін кандидат.
Одан кейін ол ұлттық құндылықтарға, салт-дәстүрімізге қарсы болатын мерекелерге қарсы тұруымыз керегін айтты. Тіпті мемлекеттік деңгейде, заң жүзінде тыйым салу керек.
Айтуынша, біздің қазақ елімізге жастарымыздың миын улайтын мерекелер керек емес. Оның орнына балаларымызға қазақтың рухани қазынасын сіңіруді бастауымыз керек.
Ұлттық құндылықтар, салт-дәстүр ұлықталған елдің жастары еліктегіш болмайды. Біз осы жағын күшейтуіміз керек. Дәстүрлі мейрамдарымызды насихаттайық! Қазақтың рухани қазынасын балалардың бойына сіңіруді осы кезден бастайық, достар.
Халқымызға жат, жастардың санасын улайтын дүниелерден алшақ болайық!
деп жазды Қарақат Әбден.
