Ресей өзінің Орбиталық қызмет көрсету станциясы салынып, пайдалануға берілгенше ғарышкерлерінің Халықаралық ғарыш станциясында (ХҒС) ұша беруін қалайды. Бұл туралы Reuters сайты жазды.
NASA-ның ғарыш операциялары бөлімі басшысы Кэти Людерс Ресейдің ресми тұлғалары америкалық ғарыш агенттігіне Роскосмос әзірше серіктестікте қалуды қалайтынын мәлімдегенін айтты.
Оның айтуынша, Ресей ROSS деген Орбиталық форпосты іске қосылғанша және пайдалануға берілгенше серіктестікте болады.
Халықаралық ғарыш станциясы футбол алаңы көлемімен бірдей. Ол Жерден, шамамен 250 миль (400 км) биікте орналасқан. Станция Америка-Ресей серіктестігі шеңберінде 20 жылдай уақыт қолданылып келеді. Оның құрамында Канада, Жапония және 11 Еуропа елі бар.
Еске салайық, бұған дейін Роскосмостың бас директоры Юрий Борисов Ресей Халықаралық ғарыш станциясы (ХҒС) жобасынан 2024 жылдан кейін шығады деп мәлемдеген еді.
