Алматының екі тұрғыны бұл әрекеттерін арнайы гараждарда жасап келген.

Көлік құралының сәйкестендіру нөмірін қолдан жасау, жою, көлік құралын қасақана жалған сәйкестендіру нөмірімен сату дерегі бойынша полиция қызметкерлері Алматы қаласының екі тұрғынын ұстады.

ҚР ҚК-нің 386-бабы 2-бөлігі бойынша қылмыс жасады деген күдікпен 1984 жылы туған С.есімді азамат және 2001 жылғы К.есімді азамат ұсталды. Күдіктілер жұмыс істеген гаражда жиынтық деректерін ауыстыру үшін дайындалған түрлі маркалы 10 көлік табылды,

деді Алматы қалалық Полиция департаменті бастығының орынбасары Дидар Аханов.

Күдіктілер бұрын сотталған. Олар жиынтық деректерін өзгертумен айналысқанын мойындады. Сондай-ақ, гаражды тексеру кезінде барлық металдар, автокөліктерден алынған қағаз белгілер, бірнеше мемлекеттік нөмірлер, жазулары бар блокноттар, ноутбук, мониторлар мен процессорлар табылды. Олар заттай айғақ ретінде қылмыстық іске қоса тіркелді.

Криминалистер, жиынтық деректерді өшіру немесе өзгерту үшін қолданылатын екі лазерлік таңбалау аппаратын, әріптік және сандық белгілері бар металл баспаларды, көлік құралдарының жиынтық деректеріне ұқсас қаріптерді тәркіледі.

Қазіргі уақытта сәйкестендіру нөмірлері өзгертілген көліктерді анықтау бойынша жедел-іздестіру іс-шаралары жүргізіліп жатыр.

Күдіктілер қамауға алынды.