Президент сайлауы тақалды. Кандидаттар іріктелді. Тоқаевтың басты қорқынышы – Назарбаевтың адамдары президент тағына таласпады бұл жолы.
Тоқаевқа қарсылас болады деп таңдалған кандидаттар – Қазақстан халқына таныс емес, өңшең көлденең көк аттылар. Ешқайсысының Тоқаевты жеңетін титтей де шансы жоқ.
Мысалы, Жигули кандидат боп шыға келетінін өзі де күтпегенін еш бүкпесіз жайып салды. 2015 жылы Әбілғазы Құсайынов та өзінің кандидат екенін соңғы сәтте білген еді.
Қазіргі сайлауалды науқан тым сүреңсіз, Қазақстан халқының қатысуынсыз өтіп жатыр.
«Сайлауалды бағдарламалар» Қазақстанның қарапайым халқының шынайы өмірінен алыс. Салтанат деген кісі ит пен мысыққа мемлекеттік питомник құрамын депті. Елімізде 45 мың жас отбасының баспанасыз жүргенінде шатағы жоқ. Жигули ауыл халқына кредит беретін банк құрам депті. Қазақтың онсыз да қарызға батқанын, халықтың басындағы кредиттің 11,4 трлн теңге екенін айтпайды. Елде 6,3 миллион ересек тұрғынның жабылмаған кредиті бар,
дейді философия ғылымдарының кандидаты Нұртаза Қадырниязов.
Рас, ешбір кандидаттың елді экономикалық дағдарыстан шығаратын, бағалардың өсуі, инфляция мен жұмыссыздықпен күресетін нақты жоспары жоқ. Сыртқы қарызымыз 165 млрд доллар.
Ең қызығы, кезектен тыс өтетін бұл сайлауға бюджеттен 20 млрд доллар бөлінді.
Мұндай қойылым-сайлау ел үшін өте қауіпті. Елбасы кезінде де ешқашан шын кандидат болмаған, дауыс әділ саналмаған. Сіздерді білмеймін, бірақ өз басым дауыс беруге бармаймын. Сайлау учаскесіндегі адам қарасын көбейткім келмейді, саяси спектакльге қатысқым келмейді. Бұл сайлауда бақылаушы болудың да пайдасы жоқ, кім үшін күресіп, қандай дауыс үшін жыртылмақсың? «Қасым-Жомарт Тоқаев 61-72 пайыз дауыс жинап, Қазақстанның жаңа-ескі президенті боп қала береді», дейді көптеген болжамдар. «Бәріне қарсымын» деген графа есепке алынбайды екен, оған бүкіл қазақ дауысын берсе де. Бұл жерде тек қосымша табыс көретін мектеп директорлары мен мұғалімдер үшін ғана қуануға болады,
дейді ол.
