Президент Қасым-Жомарт Тоқаев Түркі мемлекеттері ұйымының саммитіне қатысу үшін Самарқанд қаласына жұмыс сапарымен барды.
Былтыр түркітілдес мемлекеттердің ынтымақтастық кеңесі Түркі мемлекеттер ұйымы деп өзгертілген. Мемлекет басшыларының кездесуі алғаш рет өзбек қаласында ұйымдастырылды. Саммитке төрағалық ету Өзбекстанға өтті.
Өзбекстан СІМ аймақ ұйымдарымен өзара қарым-қатынас бөлімінің жетекшісі Рахматилла Нұрымбетовтің айтуынша, саммиттің күн тәртібінде сауда қатынасын дамыту, көлік және кеден қызметімен байланысты процестерді жеңілдету, қосымша көлік дәліздерін ұйымдастыру тәрізді мәселелер бар. Саммит соңында қорытынды құжат ретінде Самарқан декларациясы қабылданады.
Ұйым хатшылығы мәліметіне қарағанда, Самарқандағы саммитке Әзербайжан, Қырғызстан, Қазақстан, Түркия, Өзбекстан президенттері, байқаушы ел болып келген Түркіменстанның бұрынғы президенті Гурбангулы Бердімұхамедов және Венгрия премьер-министрі Виктор Орбан қатысуда.
Қасым-Жомарт Тоқаев Түркі мемлекеттері ұйымының Саммиті аясында Мажарстан Премьер-министрі Виктор Орбанмен кездесті.
Мемлекет басшысы Қазақстан мен Мажарстан арасындағы қарым-қатынасты, оның ішінде экономикалық ынтымақтастықты одан әрі нығайтуға ниетті екенін білдірді.
Біздің елдер арасындағы байланыс жақсы дамып келе жатыр. Әйтсе де біз екі мемлекеттің ынтымақтастығына тың серпін беруіміз керек деп ойлаймын. Әсіресе, арадағы сауда айналымының көлемі әлі де қанағаттанарлық деңгейде емес. Бұл бағытта екі елдің де әлеуеті зор. Мажарстан – Қазақстан үшін маңызды серіктес ел. Сіз Премьер-министр ретінде біздің түрлі саладағы ынтымақтастығымызды ілгерілетуге көп еңбек сіңіріп келе жатқаныңызды білемін,
деді Мемлекет басшысы.
Өз кезегінде Мажарстан Премьер-министрі Виктор Орбан екіжақты кездесуді ұйымдастырғаны үшін Қазақстан тарапына алғыс айтты.
Қазақстан мен Мажарстан арасындағы қарым-қатынастың орны ерекше. Мен осыдан бірнеше жыл бұрын алғаш рет Премьер-министр қызметін атқарғанда Қазақстан мен Мажарстанның мәдени, экономикалық байланыстары өте берік болғанын білемін. Енді екі елдің ынтымақтастығына бизнес өкілдері тың серпін беруі керек. Қазақстанның ірі компаниялары Мажарстанға инвестиция құйса, экономикалық қарым-қатынасымыз жаңа деңгейге көтерілер еді,
деді Мажарстан Премьер-министрі.
Кездесуде Қазақстан мен Мажарстан арасындағы мәдени-гуманитарлық байланыстар, сондай-ақ халықаралық және аймақтық күн тәртібіндегі мәселелер талқыланды.
