Навальный» фильмі Америка киноакадемиясының «Ең үздік деректі фильм» номинациясы бойынша «Оскар» жүлдесін алды, деп хабарлайды ВВС агенттігі.
«Оскар» жүлдесін алуға шыққан фильмнің режиссері Даниел Роэр жүлденің әлемдегі барлық саяси тұтқынға арналатынын атап өтті.
Бұл марапатты Алексей Навальный мен әлемдегі барлық саяси тұтқынға арнағым келеді,
деді фильм режиссері.
Ал Алексей Навальныйдың әйелі Юлия Навальная күйеуінің «бар жазығы – демократияны қолдағаны» деген пікірін айтты.
Менің күйеуім демократияны қолдағаны үшін, шындықты айтқаны үшін ғана түрмеде отыр. Алексей, сенің бостандыққа шығып, еліміз де азат елге айналатын күнді асыға күтемін,
деді «Оскар» жүлдесінің марапатында Юлия Навальная.
Айта кетейік, Ресейдегі оппозициялық саясаткер Алексей Навальныйдың уланғаны туралы, оның Ресейге қайтып келгені туралы баяндайтын фильмді канадалық режиссер Дэниел Роэр түсіріп, 2022 жылы кезекті фестивальдің бірінде жарыққа шығарған. «Оскар» жүлдесінен басқа, бұл деректі фильмі Британияның «Бафта» марапатын да алып үлгерген.
Алексей Навальный Владимир облысының Мелехово қаласындағы №6 колонияда жазасын өтеп жатыр. Ол 2021 жылдың қаңтарында Ресейге оралғаннан кейін бірден бас бостандығынан айырылған болатын.
Оппозиционердің айтуынша, ол түрмеде отырғанда «терроризмді насихаттауға, экстремистік қызметті қаржыландыруға, нацизмді ақтауға» байланысты оған қарсы жаңа қылмыстық іс қозғалғаны туралы ресми хабарлама алған. Саясаткер кінәсін мойындамады. Навальныйдың айтуынша, бұл әрекеттер қалыпты саяси қызметті білдіреді.
Осыдан тура бір жыл бұрын, 20 қазанда Еуропарламент Навальныйға «бостандық, демократия және адам құқықтары үшін күрестегі батылдығы үшін» деген тұжырыммен Андрей Сахаров атындағы «ой бостандығы үшін» сыйлығын берген болатын.
