Қытайлық автоөндіруші Өскемендегі «Азия Авто» зауытын қайта іске қосады деген болжам бар, дейді kolesa.kz.
Бірнеше күн бұрын Geely компаниясының өкілдері Шығыс Қазақстанға келді. Олар қала әкімінің орынбасары Дархан Сапановпен және бірқатар ведомство басшыларымен кездесті.
Іс-шара барысында автоөндіруші өкілдері Қазақстанда электромобиль шығару үшін қолайлы жер іздеп жүргенін айтып қалды. Нақты уақыт айтылмаса да, компанияның аймақтық директоры Хуан Шин бұл сұрақ қаралып, нарықты зерттеу жұмысы жүріп жатқанын хабарлады деп жазды altaynews.kz порталы.
Дархан Сапанов Шығыс Қазақстан облысы бірлесіп көлік өндіруге мүдделі екенін атап өтті. Оның үстіне машинажасау саласында бұл өңірдің тәжірибесі де, қажет инфрақұрылымы да бар.
Шенді 2021 жылғы көктемнен бері жұмысы тоқтап тұрған «Азия Авто» зауытын айтып тұрған сияқты. Ірі торапты әдіспен Lada, Chevrolet, Škoda және Kia модельдерін құрастырған компания мен Индустрия және инфрақұрылымдық даму министрлігі арасында 2020 жылы қарашада жанжал болып, кәсіпорынды жауып тастаған еді.
Қазақстан Geely өндірісін ұйымдастыруға осы «Азия Автоның» өндірістік қуатын пайдалануы мүмкін. Алаңды қайтадан саудаға қойғаны осы болжамға тағы бір дәлел болды. 5 331 490 297 теңгеден басталатын лот тыйым салған мүлікті өткізетін БЭСА-да (Бірыңғай электронды сауда алаңында) жарияланды.
Қазақстандағы Geely топтамасы 4 модельден тұрады. Арасында бірде-бір электромобиль жоқ. Гаммадан Coolray, Azkarra, Tugella және Monjaro кроссоверлерін таба аласыз.
