Отбасы банк «Әскери баспана 8/15» бағдарламасына өтінімді 25 тамыздан бастап қабылдайды. Бұл туралы банк сайтында хабарланды.
Бағдарламаға 25 тамыздан 30 қыркүйекке дейін (қоса алғанда) құжат тапсыруға болады. Бағдарлама бойынша қалай үй алуға болатынын қадам-қадаммен түсіндірейік.
1-қадам. Бағдарламаға қатысуға өтінімді 30 күнтізбе күні бойы Баспана Маркет порталында беруге болады. Бағдарламаға мына азаматтар өтінім бере алады:
- банкте арнайы салымы бар, бірақ бұл салым бұрын онлайн жеңілдік арқылы сатып алынған депозитпен біріктірілмеген болуы керек;
- «Әскери баспана» бағдарламасына қатысуға қазір өтінімі жоқ;
- «Әскери баспана» бағдарламасы бойынша несие алу үшін қазір несие өтінімі жоқ;
- «Әскери баспана» бағдарламасы бойынша алған несиесі жоқ.
2-қадам. Өтінімдерді қабылдау аяқталғаннан кейін негізгі және резерв тізімдер автоматты түрде шығады. Тізім тұрғын үй төлемдерін алушылардың арнайы салымы бойынша жинақталған сыйақының ең көп сомасы негізінде жасалады. Демек арнайы салым бойынша тұрақты түрде ақша жинаған тұрғын үй төлемдерін алушылар тізімге енеді. Негізгі немесе резерв тізімге өткен-өтпегенін өтінім беруші «Баспана Маркет» порталындағы жеке кабинетінен көре алады.
3-қадам. Негізгі тізімге кірген тұрғын үй төлемдерін алушыларға 180 (жүз сексен) күнтізбе күні ішінде мына әрекеттерді орындау керек:
- Төлем қабілетін алдын ала бағалауды банк бөлімшесінде, банк кеңесшісіне немесе видеоқоңырау арқылы өткізіңіз.
- Үйді тауып, оны бағалаңыз.
- Несие алуға өтінімді банк бөлімшесінде, банк кеңесшісіне немесе видеоқоңырау арқылы жіберіңіз.
4-қадам. Несие алу.
5-қадам. Қоныстой толау.
Қосымша: қатысуға өтінім бергеннен кейін, негізгі және резерв тізімдер шыққанға дейін арнайы салымы бойынша депозиттен кейінгі операциялар (тағайындау, тоқтату, біріктіру) жүргізе алмайды.
Өтінім беруге арналған видеонұсқаулық бағдарлама басталар кезде банк сайтында жарияланады.
