Шолпан -Атада (Қырғызстан) Орталық Азия мемлекеттері басшыларының IV-ші консультативтік кездесуі өтуде.
Қазақстан Президенті Қасым-Жомарт Тоқаев өңірдің көлік байланысын арттырып, транзиттік жағдайды дәйекті түрде жақсарту қажеттігін атап өтті.
Орталық Азияның географиялық орны ерекше. Жаңа геосаяси болмысымыз трансконтиненталдық сауданы дамытуға ыңғайлы. Осы жағдайда Қазақстан Транскаспий халықаралық көлік бағытын белсенді дамытуда.
2017 жылдан осы бағытта контейнерлерді тасымалдау үш есе артты – 25 мыңға дейін. Сонымен қатар, Қазақстан Мазари-Шариф-Кабул-Пешавар теміржолының құрылысына қатысуға дайын,
деді мемлекет басшысы.
Атап айтқанда, Қазақстан теміржол жолдарының жоғарғы құрылымын материалдармен және жылжымалы құраммен үздіксіз қамтамасыз ете алады.
Біз өз тарапымыздан әріптестерімізді Шығыс Азия мен Парсы шығанағы елдері арасындағы ең қысқа жол Қазақстан-Түркіменстан-Иран темір жолын белсендірек пайдалануға шақырамыз,
деп атап өтті Тоқаев.
Қазақстан Президентінің жуырдағы Иранға сапары барысында Түркіменстан мен Иран аумағы арқылы Қазақстаннан Түркияға алғашқы контейнерлік пойыз жолға шықты. Бұл жаңа логистикалық шешім небәрі 12 күнде алты мың шақырымнан астам жол жүруге мүмкіндік береді. Таяу Шығыс пен Еуропа елдерінің нарықтарына шығуды Қазақстанның Ақтау және Құрық теңіз порттары қамтамасыз ете алады.
Түркіменбашы портының инфрақұрылымын сәтті дамытып жатқан Түркіменстанның да осы бағытты ұстанатынына сенімдімін. Бұл ретте елдеріміз өзара көлік коммуникациясын дамытуды назардан тыс қалдырмауы керек. Біз қазір Өзбекстанмен белсенді ынтымақтастықтамыз . «Дарбаза – Мақтарал» теміржол желісінің іске қосылуы өткізу қабілетін екі есеге арттырып, жүктерді тасымалдау уақытын 1,5 есеге қысқартады,
деп түсіндірді Қасым-Жомарт Тоқаев.
«Түркіменбашы – Қарабогаз – Қазақстан шекарасы» жаңа тас жолының құрылысы да қолдау тапты. 2025 жылдан бастап автожолдың Жаңаөзен-Түркіменстан шекарасы учаскесін қайта жаңғырту жұмыстарын бастау жоспарлануда. Осы бағыттағы іс-шараларды үйлестіру қазақстандық көлік-логистикалық жобалардың қарқынын айтарлықтай арттырар еді.
Президент Қасым-Жомарт Тоқаев Орталық Азия елдерін мемлекеттер арасындағы қарым-қатынасты бұзу әрекеттеріне қарсы күресте күш біріктіруге шақырды.
