Түркістан облысында Қызыл кітапқа енген тау арқарын сойып алған тұрғын ұсталды. Бұл туралы Түркістан облысы ПД баспасөз қызметі хабарлады.

Полиция қызметкерлері тұрғыннан арқар етін тапқан.

Бәйдібек ауданы Табиғатты қорғау тобының инспекторы полиция капитаны Алмас Серіков күнделікті жұмысын атқару кезінде, таулы аймақта атқа мінген ер адамды байқап, оны тоқтатып не мақсатпен жүргенін сұраған. Сонымен бірге тұрғынның өзімен бірге алып келе жатқан қапқа көзі түсіп, күмәнданып, қапты тексерген. Осы кезде қап ішінен белгісіз аңның жаңа сойылған еті табылып, тәркіленіп алынды. Сараптама тағайындалды.

Полицейлер ер адамнан жауап алу барысында, ол қаптағы ет арқардың еті екенін, оны ұстаған кезін өз ұялы телефонына түсіріп алғанын айтқан. Мал бағып жүрген жігіт өзінің иттерімен бірге арқарды ұстап алған. Одан кейін жануарды сойып, қайтып келе жатқанында полицейге ұсталған.

Бүгінде бұл дерек Қылмыстық деректің 339-бабы «Сирек кездесетін және құрып кету қаупі төнген, сондай-ақ пайдалануға тыйым салынған өсімдіктер мен жануарлар түрлерін, олардың бөліктерін немесе дериваттарын заңсыз пайдалану» бойынша тіркеуге алынып, соталды тергеу амалдары жүргізіліп жатыр.