Түркістанда өзгенің атына несие рәсімдеген жігіт анықталды. Бұл туралы Polisia.kz хабарлады.
Жәбірленушінің айтуынша, оның атына белгісіз біреу несие алып, 900 мың теңгеден астам шығын келтірген. Бір айдан соң банктен несиеңізді төлеңіз деп хабар келгенде, жәбірленуші тез арада тәртіп сақшыларынан мән-жайды анықтауға көмек берулерін сұраған.
Аталған жайт ҚР ҚК-нің 190-бабы (Алаяқтық) бойынша тіркелді. Нәтижесінде осы қылмысқа қатысы бар күдікті анықталды. Ол жұмыссыз жас жігіт, жергілікті тұрғын болып шықты.
Ол жолаушы ретінде көліктерге отырып, көлік иелерінің телефондарын сөйлесу мақсатында алдап алып, несие рәсімдгені белгілі болды. Күдікті жігіттің бұдан басқа алаяқтықтың 5 жайтына қатысы бары расталды. Жәбірленушілерге 6 миллион теңге шығын келген.
Қазіргі таңда сезіктіге қатысты сотқа дейінгі тергеу амалдары жүргізіліп жатыр. Күдіктінің басқа да осындай алаяқтық қылмысына қатысы бар-жоғы анықталып жатыр.
