Түркия мен Сирияда болған жойқын жер сілкінісінен қаза тапқандар саны кем дегенде 7 726-ға жетті, деп хабарлайды CNN.
Түркия вице-президенті Фуат Октай кем дегенде 5 894 адамның қаза тауып, 34 810 адам жарақат алғанын айтты.
Оның айтуынша, апат орнында 16 мың 139 топ іздестіру-құтқару жұмысы жүргізіліп жатыр.
70-тен астам ел құтқару топтары мен басқа да көмек жіберген.
Сирияның SANA мемлекеттік ақпарат агенттігі үкімет бақылауындағы Алеппо, Латакия, Хама, Идлиб және Тартус провинцияларында болған жер сілкінісінен кем дегенде 812 адам қаза тапқанын хабарлады.
CNN хабарлауынша, Сирияда кем дегенде 1 832 адам қаза тауып, 3 894 адам жараланған.
ДДСҰ бағалауы бойынша, зардап шеккен аумақтарда барлығы 23 миллионға жуық адам тұрады. Ұйым қаза тапқандардың саны 20 мыңнан асуы мүмкін екенін ескертті.
Сейсмологтар 6 ақпанға қараған түні 7,7 баллдық жер сілкінісін тіркеді. Ол Сирия шекарасына жақын орналасқан Түркияның Газиантеп қаласының маңында болды. Осыдан кейін бірнеше ондаған жер сілкінісі тіркелді. Кеше күндіз тағы 7,6 баллдық жер сілкінісі болған.
Түркияда бұған дейін жойқын зілзала 1999 жылы болған. Ол кезде Ыстамбұлдан алыс емес жерде, Измитте Мәрмәр теңізінің жағалауында магнитудасы 7,7 балл болатын жер сілкінісі 17 мыңнан астам адамның өмірін қиған еді.
