Соңғы бірнеше аптада түрік полициясы мекемелер мен кәсіпорындарды текстеріп, мыңдаған заңсыз мигрантты ұстады.
«Ahaber» телеарнасының хабарлауынша, кейінгі айда түрік полициясы елдегі заңсыз мигранттарды анықтау мен ұстау мақсатындағы рейдтерді көбейткен. Әсіресе Стамбұл қаласы мен туристік аймақтар тексеріліп жатыр.
Соңғы екі күнде 18 мигрант ұсталды. Бір айда 15 мыңнан астам заңсыз мигрант ұсталды. 6 мыңға жуық адам депортацияланды. Тағы 9 мыңға жуық заңсыз мигрантты депортациялау ісі жүріп жатыр
деп хабарлады телеарна.
Осының алдында ғана Түркия президенті Режеп Тайип Ердоған түрік азаматтары «заңсыз мигранттар мәселесі қалай шешіліп жатқанын сезеді» деп мәлімдеген.
Стамбұлда тұратын түркімен азаматтарының айтуынша, кейінгі апталарда рейдттер кезінде кем дегенде алты отандасы ұсталып, Тузла ауданындағы депортациялау орталығына түскен.
