Түркияның оңтүстігінде болған жойқын жер сілкінісінен қаза тапқандар саны 41 020-ға жетті. Бұл туралы Түркияның Төтенше жағдайлардың зардаптарын жою департаменті (AFAD) хабарлады, деп хабарлайды Anadolu агенттігі.
AFAD басшысы Юнус Сезер 6 ақпандағы жойқын жер сілкіністерінен 6 210-нан астам ұсақ жер сілкінісі болғанын мәлімдеді.
Қазір Түркия мен шет елдерден келген іздеу-құтқару топтарының 19 436 мүшесі үйінділерден тазарту жұмыстарын жүргізіп жатыр. Түркияның Кахраманмараш және Хатай провинцияларын қоспағанда, көптеген аймақта құтқару жұмыстары аяқталып жатыр. 19 ақпандағы жағдай бойынша:
- 40 ғимаратта 200 000 адам іздеп жатыр;
- билік тарапынан 250 000 шатыр мен 6 000 контейнер үйі орнатылды;
- апат аймағынан 461 мың адам басқа аймақтарға көшірілді;
- жер сілкінісінен зардап шеккен 319 000 адам қонақүйлерге орналастырылды;
- жер сілкінісінен зардап шеккен аудандардың тұрғындарына 10 мың түрік лирасы (530 доллар) бөлінді.
Еске салайық, 6 ақпанда эпицентрі Түркияның Кахраманмараш провинциясының Пазарджик аймағында магнитудасы 7 баллдан асатын екі жер сілкінісі болды. Жойқын жер сілкінісінен кейінгі тағы жүздеген дүмпу елдің 11 провинциясында, сондай-ақ көршілес мемлекеттерде, соның ішінде Сирияда да сезілді. Мамандар аймақта жерасты дүмпулері тағы жарты жыл бойы жалғасады деп отыр.
Түркиядағы жойқын жер сілкінісінен кейін үйінділерді аршуға 88 елден 11 мың құтқарушы қатысты — Астана мен Алматы қалаларының, Ақмола және Қарағанды облыстарының құтқарушылары іздестіру-құтқару жұмыстарына қатысты. ҚР Президенті Қасым-Жомарт Тоқаев Түркиядағы жер сілкінісінің салдарын жоюға қатысқан қазақстандық құтқарушылар елге оралған соң марапатталатынын айтты.
18 ақпанда қазақстандық құтқарушылардың алғашқы эшелоны Түркиядан Алматыға оралды. Оларды туыстары әуежайдан күтіп алды. Нұрдагы қаласындағы жойқын жер сілкінісінің салдарын жоюға жұмыс істеген қазақстандық құтқарушылардың екінші эшелоны да туған жерге аман-есен оралды. ҚР Төтенше жағдайлар министрлігі Апаттар медицинасы орталығының бір топ құтқарушылары мен дәрігерлері бар ұшақ Астана әуежайына қонды.
