Таиландтың солтүстік-шығысындағы Нонгбуа Лампху провинциясындағы балалар орталығында болған атыстан қаза тапқандардың саны 36-ға жетті. Оның ішінде 24-і бала.
Таиландта бұрынғы полиция қызметкері балабақшаға тал түсте кіріп, оқ жаудырған. Ең алдымен қаскөй орталықтың төрт қызметкерін өлтіріп, артынша балалар ұйықтап жатқан бөлмеге бет алған. Қаскүнемнің қолынан қаза тапқандардың ішінде балалар мен тәрбиешілер бар. Бұл туралы жергілікті БАҚ пен полиция мәлімдемесіне сілтеме жасап Reuters хабарлады.
Жергілікті Khaosod газетінің хабарлауынша, тағы 12 адам жараланған, оның 8-інің жағдайы ауыр.
Атысты шабуылды подполковник Паня Хамраб ұйымдастырған. Мәліметтерге сүйенсек, экс-полицей есірткі қолданғаны үшін жұмысынын қуылған екен.
Оқиғадан кейін ол ақ түсті Toyota Vigo жүк көлігіне отырып, ізін суытқан. Басқа мәліметтерге қарағанда, ол өзінің әйелі мен баласын өлтіріп, кейін өз-өзіне қол жұмсаған.
Қазір оның бұл әрекетінің себептері анықталуда.
