Жастар үшін ең өзекті мәселе баспана екені баршаға мәлім.
Мемлекет басшысы Қасым-Жомарт Тоқаев Алматы қаласы жұртшылығымен кездесуі барысында жастар үшін ең өзекті мәселе баспана екеніне баса аударды.
Алматы тұрғындарының көпшілігі, әсіресе, жастар үшін баспана – ең өзекті мәселе.
Қалада пәтердің бағасы тым жоғары. Әрине, еңбек жолын енді ғана бастаған жастар бірден пәтер сатып ала алмайтыны түсінікті. Бірақ, солай екен деп еш қарекетсіз қол қусырып отыруға болмайды. Жастардың баспана алуына жан-жақты жағдай жасау керек. Бұл – мемлекеттің басты міндетінің бірі,
деді Президент.
Енді әкімдік жалға берілетін тұрғын-үй салу үшін инвесторларға тартымды болатын тиімді тәсілдер ойластыруға кіріседі. Ең бастысы жалдамалы үйлер тым қымбатқа түспеуі керек. Ондай пәтерлер, ең алдымен, қолжетімді болуға тиіс. Жалпы, Алматы жастары үшін баспаналы болу қол жетпес арман болмауы керек. Басында баспанасы бар жастардың ертеңгі күнге деген сенімі артады.
Мемлекет басшысы қалада тұрғын-үй тапшылығын азайту аса маңызды міндет екенін айта келе, шаһар басшылығына тапсырма берді.
Келесі жылдан бастап тұрғын-үй құрылысын жыл сайын 10 пайызға арттыру қажет. Әрине, Алматыда бос жер аз. Бұл жағдай құрылыстың қарқынын күшейтуге кедергі келтіруі мүмкін. Сол себепті, жаңа жерлерді игеру керек. Қалада 1500-ге жуық ескі үй бар. Шағын аудандарда тұрған мұндай үйлерге күрделі жөндеу жүргізген жөн. Ал жаңғыртуға келмейтіндерін сүріп тастау қажет,
деді Қасым-Жомарт Тоқаев.
Енді Президенттің бұл тапсырмасын орындау үшін әкімдік кезең-кезеңмен жүзеге асыру үшін нақты жоспар әзірлеуді бастайды.
