Армения, Ресей және Қырғызстаннан келген машиналар есепке қойылуы мүмкін.
Қазақстан президенті Қасым-Жомарт Тоқаев 1 қыркүйектегі Жолдауында елде жүрген шетелдік көліктер туралы айтты. Ол елге заңсыз жолмен машина әкелуді тоқтатып, бұған дейін жеткізілгендерді заңды тіркеуді ұсынды.
Бұдан кейін елге заңсыз жолмен автомобиль кірмеу үшін қатаң шара қабылдау қажет. Ал биыл 1 қыркүйекке дейін әкелінген машиналардың мәселесін шешу керек,
деді Қасым-Жомарт Тоқаев.
Президент мұндай көлікті заңдастыру үшін утиль алымы мен алғашқы тіркеу сомасының орнына 200–250 мың теңге мөлшерінде төлем алуды ұсынды. Бұл шешім іздеуде жоқ және кедендік рәсімдеуден өткен машиналарға қатысты.
Президент Қазақстанда шетелдік машиналарды тіркеуді ұсынып отыр, бірақ бұл шара қалай жүзеге асатыны, қазір қолданыстағы кейбір ережемен қалай үйлесетіні белгісіз.
Мысалы, біздің елде оң рөлді және Еуро-4 стандартына сай келмейтін көліктер бастапқы тіркеуге қойылмайды. Жақында жауапты мекемелер тиісті ұсыныстарын айтатын шығар.
Айтпақшы, Еуразиялық экономикалық одақтың (ЕАЭО) кеден аумағына үшінші елдерден уақытша әкелінген көлік құралдары шетелдік тауар саналады және кедендік бақылауда болады.
ҚР Мемлекеттік кіріс комитеті хабарлағандай, уақытша әкелінген көлік құралдарын кедендік тазартудан соң және тиісті кедендік алымдар мен салықтарды төлеген соң ғана сатып алуға және Қазақстан аумағында пайдалануға болады.
Ал уақытша әкелу мерзімі – 1 жыл.
Кедендік тазарту тәртібі туралы ақпаратты тұрғылықты жері бойынша мемлекеттік кірістер органдарынан білуге болады.
