«Елге өзгеріс керек екені бәріне аян бола бастады. Бірдеңе қылмасақ, енді жағдайымыз тек қиындай беретіні анық», дейді саясаткер Қазбек Бейсебаев.
Мемлекеттік органдар мен өзге де құрылымдарға тиісті ұсыныстар әзірлеңдер деген міндет қойылды деген ақпарат бар. Жаңа парламенттің алдында да осындай міндет тұр.
Ғылыми институттар өз ұсыныстарын әзірлеп, онысын жоғары жаққа жолдауда.
Түк тындырмай отырмыз деуге де келмес, белгілі бір жұмыстар жүргізіліп жатыр.
Бірақ өзгерістер тым баяу жасалуда, кей жұмыстарды қасақана тежейтіндер бар.
Оның да түрлі себебі бар.
Біріншісі – ескі Қазақстанның кадрлары, олар реформаларға іштей қарсы. Өйткені олар үшін реформалар деген – өздерінің жауапқа тартылуы. Оларға мұның ұнамайтыны белгілі.
Екінші себеп – шенеуніктердің өзі. Шенеуніктер табиғатынан реформа жасауға мүдделі емес. Кез-келген шенеуніктің көксейтіні жұмысты азырақ істеп, ақшаны көбірек алу. Шенеуніктің бар ісі жоғарыға есеп беру. Қазақ шенеунігі совет армиясындағы солдат сияқты, «жата берейін, борышым өтеле берсін» деген.
Жылдар бойы біздің шенеуніктеріміз бен басшыларымыздың ерекше жұмыс стилі қалыптасты: олар уәде беру мен есеп беру үшін ғана жұмыс істеуге әбден үйреніп алды. Сол себепті бізде түрлі бағдарламалар қабылданып жатады, арты ешқандай нәтижемен аяқталмайтын.
Содан біз қызық жағдайға келдік. Реформа туралы көп айтамыз, бірақ өзіміздің өзгеріске құлықсыз қоғамымызға келіп тірелеміз.
Тіпті ғылыми институттардың кейбір мықты ұсыныстары үлкен шенеуніктердің қолына түсіп, сол жерден ары ешқайда шықпай қалады деген ақпарат бар.
Бұл мәселені шешуге тырысып көру үшін бізге бір нақты қадам жасау керек: Реформалар орталығын құрып, оған белгілі бір бағыттарда жұмыс істейтін тәуелсіз сарапшыларды жинау қажет. Олар елді реформалайтын жөнді ұсыныстарын ойлап тауып, оны жүзеге асырса.
Президент жариялаған саяси модернизация аясында мемлекеттік органдар мен азаматтық қоғам өкілдерінің қатар жұмыс істегені қажет. Орталықтың штаты бюджеттен қаржыландырылсын. Ол жерде басшы болмауы керек, бәрі тең, ешкім ешкімге тәуелді болмауы тиіс. Осындай орталық болса ғой, оған баратын есті сарапшылар елімізден көптеп табылады,
деп жазады сарапшы.
