23 қарашада Бішкек соты журналист Болот Теміровті елден шығару туралы шешім қабылдады. Бұл туралы Kaktus.media хабарлады.
Прокурор сот алқасынан Теміровті өзіне тағылған Қылмыстық кодекстің баптары бойынша кінәлі деп тануды, елден шығаруды сұрады. Оған қоса ол айыпталушының Қырғызстан азаматтығы жоқ екенін алға тартты. Ал Теміровтың адвокаттары Бішкек қаласының Свердлов аудандық сотының үкімін өзгертіп, қылмыс құрамының жоқ болуына байланысты журналисті толық ақтау керек екенін айтты.
Алайда кеңесу бөлмесінен оралған сот алқасы журналист Болот Теміровтің елден шығарылатынын хабарлады. Сот шешімі жарияланғаннан кейін күзет Болот Теміровті бірден сот залынан алып кетті.
Қырғызстандағы Азаттықтың хабарлауынша, 23 қараша кешке қарай зерттеуші журналист Болат Теміровті Қырғызстан күш органдарының бірнеше өкілі Бішкектегі «Манас» әуежайына жолаушылар ұшып кететін залға алып барды. Алайда журналистің қайда кететіні белгісіз.
