Қазақстаннан кейін Қырғызстан ресейлік БАҚ пен биліктің назарында. Ресей депутаттарына қырғыз парламентінің спикері Нұрланбек Шәкиевтің атаулары басқа тілдерден алынған Бішкек елді мекендерінің атауын өзгерту керек деген мәлімдемесі ұнамай қалған.
Нұрланбек Шәкиев 25 қарашада Бішкекте өткен Халық құрылтайында сөйлеп тұрып: «Өкінішке қарай, көптеген жер-су атаулары өзге тілде аталған. Оны өзгертіп, қырғыз тілінде атауымыз керек. Оның ішінде Бішкектің төрт ауданы да бар» деген еді.
Артынша Ресей мемлекеттік думасының депутаты, халықаралық істер жөніндегі комитет төрағасының орынбасары Светлана Журова мәлімдеме жасаған. Ол «Говорит Москва» радиостанциясына берген сұхбатында «мұндай мәлімдеме Қырғызстанда тұратын орыс тілінде сөйлейтін адамдардың құқығына нұқсан келтіреді» деген.
«Бұл жайдан жай айтылып жатқан жоқ. Бұл орыс тілін ығыстырып шығарудың алғашқы кішкентай қадамдары. Бұған бір секунд та күмәнданбаймын»,
дейді Журова.
Мемлекеттік дума депутатының сөзінше, Грузия мен Украинадағы оқиғаның бәрі «орыс тілін шектеуден басталған, сондықтан бұл мәселеге Ресей президенті араласуы керек». Мемлекетік думаның тағы бір депутаты Александр Ющенко Қырғызстан басшылығы «советтік кезеңге түкіріп отыр» деп мәлімдеген. Бұл жөнінде Ресейдің Газета.ру сайты жазды.
Мемлекеттік думадағы халықаралық істер жөніндегі комитет төрағасының орынбасары Дмитрий Новиков те «Қырғызстанда антисоветизм байқалатынын» атап өткен.
Бішкек қаласы Первомайск, Свердлов, Октябрь және Ленин аудандарына бөлінеді. Кейінгі жылдары бұл атауларды өзгерту жөнінде бірнеше рет бастама көтеріліп, аяқсыз қалған.
Ресейлік саяси аренаның кейбір өкілдері өз сөздерінде Қазақстанды атап өтуді де ұмытқан жоқ.
Ресей мемлекеттік думасы депутаттарының реакциясы Қырғызстан қоғамында қызу талқыланды. Қырғыздың кей депутаттары Ресейдегі әріптестерінің мәлімдемесін «Қырғызстанның ішкі ісіне араласу» деп бағалады. Бұл жөнінде Азаттықтық Қырғыз қызметі жазды.
«Ресей мемлекеттік думасының депутаты Светлана Журованың халықаралық ережеге сай келмейтін, мемлекетаралық қатынасқа көлеңке түсіретін, серіктес елдің ішкі ісіне араласқанды білдіретін мәлімдемесі негізсіз. Өйткені Қырғызстанда орыс тілі ерекше орын алып отыр, заңдарымыздан бастап, көшедегі көрнекіліктерге дейін мемлекеттік тілмен қатар қолданылып келеді»,
деген парламент депутаты Кәмила Талиеваның мәлімдемесін парламент баспасөз қызметі таратқан.
Депутат «әкімшілік-аумақтық атауларды өзгерту егеменді мемлекеттің ішкі ісі» деп атап өткен.
