Ол алаяқтық жасағаны үшін 2020 жылы 7 жылға сотталған еді.
Қызылорда облысының бұрынғы әкімі Қуанышбек Ысқақов бостандыққа шықты. Сот оны 2020 жылғы желтоқсанда алаяқтық жасады және қоғамдық қордағы 80 млн теңгені жымқырды деген үкім шығарған еді. Ол 7 жылға бас бостандығынан айырылды. Дегенмен кейін Жоғарғы Соттың қылмыстық істер жөніндегі сот алқасы қаулысымен бұл мерзім 6 жылға дейін қысқартылды. Бұрынғы мемлекеттік қызметкер жазаның өтелмеген бөлігін айыппұл немесе бас бостандығын шектеу сияқты неғұрлым жеңіл жазаға ауыстыруды сұрады.
ЗК-169/5 мекемесінің өкілі сотталушыға берілген мінездемені қолдап, оның жазаны өтеу кезінде белгіленген тәртіп пен режим талаптарын бұзбағанын, оған екі марапаттау шарасы қолданылғанын, жазалау шарасы болмағанын айтты. Ол жеңілдетілген жағдайда ұсталды, мүлік шығыны мен процессуалдық шығынды толық өтеді. Жәбірленуші өкілі де жазаның өтелмеген бөлігін жазаның неғұрлым жеңіл түрімен ауыстыру туралы өтінішке қарсылық білдірген жоқ,
деп хабарлады Қызылорданың №2 соты баспасөз қызметі.
Нәтижесінде Қуанышбек Ысқақовтың өтініші қанағаттандырылды. Жазаның өтелмеген бөлігі жеңілдеу жаза — жазаның қосымша түрін өтеуден босатылмай, 3 жыл 11 ай 12 тәулік мерзімге бас бостандығын шектеуге ауыстырылды.
Облыстық соттың хабарлауынша, сотталушы шартты түрде мерзімінен босату бойынша бостандыққа шықты.
