Биыл елімізде көші-қонды заңсыз ұйымдастыруға байланысты 66 қылмыс тіркелді. Көші-қонды заңсыз ұйымдастырудың ең көп фактісі Жамбыл облысында тіркелді. Бұл туралы Finprom.kz хабарлады.
Биыл қаңтар–тамыз айларында елімізде көші-қонды заңсыз ұйымдастыруға қатысты 66 қылмыстық құқық бұзушылық тіркелді. Бұл бір жыл бұрынғыдан 19,5%-ке аз.
Салыстыру үшін: былтыр осы кезеңде республика бойынша 82 заң бұзушылық тіркеліп, жылдық өсім 43,9% болған еді.
Көші-қонды заңсыз ұйымдастыру бабы бойынша құқық бұзушылар саны биыл 18,6%-ке азайып, 48 адамға жетті.
Көші-қонды заңсыз ұйымдастырудың ең көп фактісі Жамбыл облысында тіркелді: 17 құқық бұзушылық дерегі бар, бірақ бұл бір жыл бұрынғыдан 34,6%-ке аз.
Одан кейін Алматы қаласы: 11 дерек, жылдық өсім бірден 57,1%-ке жетті. Артынша Түркістан облысы: 9 дерек, былтырғыдан 18,2% аз.
Құқық бұзушылықтардың ең аз саны Ақмола облысы мен Астанада тіркелді: әрқайсында бір деректен. Сонымен қатар жаңадан құрылған үш облыста (Абай, Жетісу және Ұлытау), Солтүстік Қазақстан, Қызылорда, Қарағанды және Шығыс Қазақстан облыстарында бірде-бір дерек тіркелген жоқ.
Заңсыз көші-қонды ұйымдастыру бойынша қылмыстық құқық бұзушылықтар санының айтарлықтай төмендеуіне қарамастан, бірінші жартыжылдықта әкімшілік құқық бұзушылықтар саны бір жылда бірден 2,1 есе өсіп, 48,6 мың іске жетті.
Өздеріне қатысты әкімшілік жауапкершілікке тарту туралы қаулы шығарылған тұлғалардың саны — 47,3 мың адам.
28,7 мың адамға ескерту берілді, 12,9 мың адамға әкімшілік айыппұл салынды. 2,6 мың адам әкімшілік қамаққа алынды. 3,2 мың шетелдік немесе азаматтығы жоқ адам республикадан шығарылды.
