Қазақстанда енді дипломның болуы біліктіліктің деңгейін растау болып саналмайды. Бұл туралы Еңбек және халықты әлеуметтік қорғау министрі Тамара Дүйсенова мәжілісте өткен үкімет сағатында кадрларды қабылдау механизмі қалай өзгеретіні туралы айтты. Минстрдің сөзінше, енді жұмысқа орналасу кезінде диплом міндетті болмайды.
«Бұрын жұмысқа орналасу үшін артықшылық дипломның болуы болса, онда заңның қабылдануымен енді қызметкердің дағдылары мен құзыреттерін растайтын сертификаттың болуы артықшылық болады.
Жұмысқа орналасу кезінде қызметкерлердің дипломы бар-жоғына қарамастан тәжірибеде біліктілігін растауы тиіс және жұмыс берушіден сертификат алуы керек.
Дипломның болуы біліктілік деңгейін растау болып саналмайды. Бұл көп жағдайда жастардың жұмысқа орналасуына кедергі болып жатады. Осыған байланысты ұлттық біліктілік жүйесін әзірлеу арқылы білім беру жүйесін жұмыс берушілердің талаптарымен байланыстыратын «Кәсіби біліктілік туралы» заң әзірленді», — деді министр.
Сонымен қатар, тәжірибеде қажетті білім мен жұмыс дағдылары мен біліктіліктері бағаланғаннан кейін сертификаттар беріледі. Сертификат бейресми, формалды емес және информалды білімі барларға да беріледі екен.
Дипломның құны болмай ма?
Кейін ҚР Ғылым және жоғары білім министрлігінде сертификаттау және дағдылар мен құзыреттерді бағалау жүйесін енгізу туралы министрдің сөздерін қосымша түсіндірді.
«Шынында да, кейбір кәсіптер бойынша біліктілікті растау және бірқатар кәсіптер бойынша сертификаттау жүйесі жұмысқа орналасу үшін міндетті болуы мүмкін. Бірақ, бұл барлық мамандықтарға қатысты емес және кезең-кезеңімен жүзеге асырылады. Халықтың денсаулығына, тұрмыс-тіршілігін қамтамасыз етуге және қауіпсіздігіне байланысты реттелетін кәсіптер үшін бұндай тәжірибе халықаралық деңгейде қолданылады. Яғни, аталған кәсіптер Ұлттық біліктілік шеңберінің 6-8 деңгейлерінде ресми білімнің болуын жоққа шығармайды. Бұл ретте сертификаттау жүйесі арқылы алынған біліктілікті растау талап етіледі» – делінген министрліктің баспасөз қызметінің хабарламасында.
Айта кету керек, біліктілікті растау және сертификаттау жүйесі кәсіби стандарттарға сәйкестігін көрсетеді. Онда сертификатталушының білім деңгейі міндетті түрде көрсетіледі. Яғни, жоғары және жоғары оқу орнынан кейінгі, ТжКБ, орта немесе толық емес орта.
«Заң жобасында бейресми немесе өз бетімен оқу — қосымша білім ретінде қарастырылады. Бұл өмір бойы оқыту тұжырымдамасын жүзеге асыруға бағытталған. Яғни, азаматтарға белгілі бір курстар арқылы өз білімдері мен дағдыларын жаңартуға мүмкіндік беріледі», – деп атап өтті Білім министрлігі.
