Ауа арқылы жұғатын дерт балабақшаларда өршіп тұр. Осыған байланысты дәрігерлер дер кезінде вакцина алу қажеттігін айтуда. Тіпті екпе алмаған бүлдіршіндер балабақшаға жіберілмеуі де мүмкін, деп хабарлайды 31-арнаның жаңалықтар қызметі.
Елімізде күн өткен сайын қызылша дертін жұқтырып жатқандардың қарасы артуда. Екі ай бұрын шет ел асып келген 12 баладан ең алғаш аурудың белгілері анықталып тіркеліпті. Осыдан кейін бірте-бірте жан-жаққа тарала бастаған.
Енді қызылшаның ары қарай өршуін тоқтату үшін мамандар жаппай вакциналау қажеттігін айтады. Бірақ осы тұста көпшіліктің де пікірі екіге бөлінген. Бірі оны қажет деп тапса, енді бірі балаларына вакцина салдырмас үшін балабақшаларға жібермейміз деп отыр.
Екі айдың ішінде дендеген ауруды 181 адам жұқтырған. Ауа немесе тыныс алу жолдарынан бөлінетін тамшылар арқылы жұғатын індет негізінен балабақшаларда өршіп тұр. Сондықтан мамандар да мұндай жағдайға алаңдаулы. Қызылша ауруын жұқтырғандардың басым бөлігі екпе алмағандар.
18 жасқа дейінгі балалардың егу статустарын тексеру жүргізіліп жатыр. Осылардың ішінде 94 мыңға жуық балаға екпе егілмегені анықталып отыр. Қазір осы 94 мыңның 15 мыңнан астамы егумен қамтылған.
Қызылша аурын жұқтырғандар арасында Алматы қаласы көш бастап тұр. Мұнда 73 жағдай тіркелген. Одан кейін Түркістан және Жетісу облысы алдыңғы үштікте тұр. Жалпы балабақша тобындағы балалардың 90%-ы вакцинациялануы керек. Егер екпе алмағандардың саны 10%-дан көп болса, онда олардың келуіне тыйым салынуы мүмкін. Оны балабақша басшылығы шешеді дейді мамандар.
Қазіргі уақытта Алматыда вакцинация алмаған 14 мыңнан астам бала бар екен.
