Түркістан, Атырау, Маңғыстау және Алматы облыстарында кадр тапшылығы байқалған. Бұл өңірлерде математика, физика, химия, орыс тілі мен әдебиеті, шет тілі мұғалімдері тапшы.
Оқу-ағарту министрі кадр тапшылығынан өңірлерге жұмысқа келген мұғалімдермен онлайн кездесу өткізді. Министр педагогтарды бүгін қандай мәселе алаңдатып отырғанын сұрап, бар болған жағдайда тез арада шешуді тапсырды.
Сондай-ақ Асхат Аймағамбетов жайлы жағдай жасауды, мұғалімдердің тұратын үй мәселесін шешуге көмектесуді, жалақыны біріңғай төлеу мәселесін пысықтауға тапсырма берді. Өңірлерге келген үздік мұғалімдер тап болған кез-келген мәселені бірден шешуді құрылымдық бөлімшелердің басшыларына тапсырды.
Мемлекет басшысының тапсырмасы бойынша Оқу-ағарту министрлігі мұғалімдер тапшылығы немесе білім сапасы нашар өңірлерге үздік мұғалімдерді тарту үшін арнайы бағдарлама әзірлеген болатын. Атап айтқанда, лауазымдық жалақыға 250 пайыз мөлшерінде ынталандыру төлемдері қосылады. Ол қаржыға жалдамалы тұрғын үй мен коммуналдық төлемдерді өтеу кіреді. Әрі қоныс аударған педагогтың балаларына балабақша мен орта мектептен орын беріледі. Конкурстан өткен мұғалімдермен 5 жылға еңбек шарты жасалады.
