Неке қиғанда сұралатын сыйлыққа келгенде қанағатты ұмытқан бұрымдылар жарының ызасына тиіп, төркінінің сынына ілінуде. Имам алдында құны бір бөлмелі пәтермен тең дүние сұраудан сескенбейтін қыздар осылайша көпке мақтануды, не өз жағдайын жасап алуды көздейтінге ұқсайды.
Мәһр — жігіттің қалыңдықтың өзіне ғана арнап беретін сыйлығы. Яғни, мәһр – некелесу барысында немесе қалыңдыққа кейін берілетін дүние-мүлік немесе ақша. Мәһрді қыз бала жеке өзі пайдаланады. Сый болғандықтан қалың мал мен мәһрдің мөлшері белгіленбеген. Бірақ, қазіргі таңда пендешілікке салынып, сыйлықтың қандайда бір мөлшерге ие деп жататындар да жоқ емес. Осыны пайдаланып кетіп жатқан бойжеткендер кейбіреулері үй немесе су жаңа қымбат көлік сұрауда. Адал жардан бұрын, қымбат дүниені сұраған қызға ренжіп, намыстанған жігіт некесін қимай, тастап кетіп жатқандар да кездесіп жатыр.
«Дүниені армандаған қызды жар қылмаймын» деп, неке қиылмай жатыр, дейді имам.
Ал жасы үлкендер мәһрсіз де некелерін қиып, бақытты ғұмыр кешіп жүргендерін алға тартты. Жастардың осылай еліктегіш әрі дүнигеге беріліп кеткендігіне ашулы да. Үлкен жастағы ата-әжелеріміз қазақ қыздарына кеңес беруден тыс қалмады.
Бірінші жылдары қиындықты бірге көріп, байлыққа бірге жетуді ойлаңдар
Мешіттерде неке қию барысында мәһрге нақты шек қойылмағандықтан, көпшілік ортада түсініспеушілік орын алуда. Көбіне қыздардың ата-аналары немесе өздері мөлшерден артық талап қоятыны бар. Мәһр беру мәселесінде ер азаматтың өзі немесе ата-анасы емес, қалыңдық жақ талап қойып жүр. Бұл ретте ер азаматтың материалдық деңгейіне қарап, отбасының әлеуметтік деңгейін байқап қана мәһр мәселесін ойланған абзал болмақ.
Шындығында, мәһр заң бойынша да, шариғат бойынша да тоқтатылатын амал емес. Имамдардың айтуынша, мәһр беру ерлерге әрбір некелесуде міндеттелген. Қымбат көлік, құндыз тон һәм гауһар жүзікті аңсаған арулар таңдаған азаматының жағдайына алаңдамайтын кездің жеткені мәһрге қымбат көлік сұраған қалыңдықты жігіті дәл мұсылмандық неке қию рәсімінде тастап кеткен оқиға арқылы көрініс тапқан еді.
