Қылмыстық кодекстің «жас балаларды азғындық жолға түсіру» бабымен сотталып, кейін ақталып шыққан ақтөбелік моральдық, мүліктік және өкіл көмегін өндіріп алды.
Мемлекеттен оған 70 млн теңгеге жуық ақша берілуге тиіс.
Оқиға 2021 жылдың наурыз айында болған.
Ақтөбелік пен оның азаматтық некедегі күйеуіне Қылмыстық кодекстің «жас балаларды азғындық жолға түсіру» бабы бойынша айып тағылып, сотталды.
Кейін екі сотталушы да ақталып, моральдық және мүліктік зазалды өндіруге арыз түсірді.
Ақтөбе облыстық соты азаматтық істер жөніндегі сот алқасы Ақтөбе қалалық сотының моральдық және мүліктік зиянды өндіру туралы шешімін өзгертті.
— М. заңсыз қудаланып, қамауда бір жылдан астам уақыт болғандықтан моральдық азап кешкенін негізге ала отырып, 30 000 000 теңге моральдық зиян және 59 844 344 теңге мүліктік зиян өндіруді сұрады. Бірінші сатыдағы соттың шешімімен талап ішінара қанағаттандырылып, 7 млн теңге моральдық, 43 015 417 теңге мүліктік зиян және 4 000 000 теңге өкіл көмегіне жұмсалған шығын өндірілді. Сот алқасы талап қоюшының зиянын есептеу кезінде инфляция коэффициентін қолдану қажет деген тұжырыммен келісті. Сонымен қатар, мүліктік зиян есебіне адвокаттың жол жүру және тұру шығындары есептелді. Осылайша сот алқасының шешімімен өндіруге жататын мүліктік зиян мөлшері 54 186 557 теңгеге, ал өкіл көмегінің есебі 5 430 000 теңгеге дейін көбейтілді. Шешімнің қалған бөлігі өзгеріссіз қалды. Апелляциялық қаулы заңды күшіне енді,
деп хабарлады Ақтөбе облыстық сотының баспасөз қызметі.
