Сенат төрағасы Мәулен Әшімбаев Екібастұз, Риддер, Рудный және басқа да бірқатар қалалардағы ірі коммуналдық апаттарды саладағы «жүйелі проблемалардың заңды нәтижесі» деп атады.
Қазір жылу-электр станциялары мен электр желілерін ауқымды тексеру жұмыстары жүріп жатыр, олар осы жылдың бірінші тоқсанында аяқталуы керек.
Еліміздегі электр желілерінің тозуы 50 пайыздан асады. Бұл – орташа көрсеткіш. Ал кейбір өңірлерде тозу көрсеткіші 80 пайызға жетіп отыр.
Жылу-электр орталықтарының жағдайы бұдан да сорақы.
Сенатта өткен парламенттік тыңдауда Мәулен Әшімбаев:
«Жалпы электр станцияларының негізгі жабдықтарының тозуы 57 пайызға жетіп отыр. Ал жекелеген өңірлерде бұл көрсеткіш 88 пайыз деңгейінде. Жыл сайын жылу-электр орталықтарының тозуы артып келеді, қазіргі таңда 66 пайызға жетіп отыр. Жекелеген өңірлерде жылу-электр орталықтарының тозуы 90 пайыздан асады»,
деді.
Сенат спикері Мемлекет басшысының «Инвестициялардың орнына тариф» бағдарламасы есебінен генерациялаушы қуаттардың тозуын төмендету туралы тапсырмасын еске салды.
