Алматы полициясы алаяқтың арбауына түскен азаматтарды іздестіріп жатыр. Бұл туралы Polisia.kz хабарлады.

Тергеу барысында А. есімді азаматша өзін екінші деңгейлі банктердің бірінің қызметкері ретінде таныстырғаны анықталды. Ол кепілге қойылған мүлікпен жұмыс істейтінін айтқан. Сөйтіп Алматыда жоқ пәтерлерді сатқан.

Бұл туралы қаланың бірнеше тұрғыны полицияға алаяқтық туралы арыз жазғаннан кейін белгілі болды.

Күдіктінің іс-әрекетінің шарықтау шегі 2012-2013 жылдары болды. Өзін банк қызметкері ретінде көрсетіп, А. есімді азаматша пәтер беремін деген желеумен ақша талап еткен. Алдын ала төлем сомасы пәтердің шаршы метріне байланысты болған. 3 бөлмелі пәтерге 70 мың доллар, 1 бөлмелі пәтерге 17 мың доллар алған. Ақшаны алғаннан кейін іскер әйел байланысқа шығуды тоқтатқан. Ал алданған азаматтар уәде етілген баспананы ондаған жыл бойы күткен. А. есімді азаматша ұсталды. Қылмыстық істер бір өндіріске біріктірілді. Сотқа дейінгі тергеу ҚР ҚК-нің 190-бабы 3-бөлігінің 1-тармағы (Алаяқтық) бойынша жүргізіліп жатыр. Істі қарау барысында ұсталған азаматшаның осыған ұқсас 4 эпизодқа қатысы бар екені белгілі болды. Келтірілген шығынның жалпы соммасы анықталып жатыр,

деді қалалық ПД тергеу басқармасы бастығы Мұхамедәлі Сейсенұлы.

Тергеу мерзімінде А. есімді азаматшаға қатысты қамауға алу түріндегі бұлтартпау шарасы таңдалды. Тергеу жалғасып жатыр.

Айтпақшы, 2014 жылы әйел адам осыған ұқсас қылмыстары үшін сотты болған. Қазір оның қылмыстық әрекеттерінен зардап шеккен азаматтарды анықтау үшін күдіктінің жеке басын жария етудің процессуалдық қажеттігі туды. Бұл азаматшаны таныған адамдар болса, мына телефон нөмірлері арқылы хабарласуын сұраймыз: 8-701-732-86-54 және 8-701-624-28-24,

деді Мұхамедәлі Сейсенұлы.