Үкімет отырысында қала сыртындағы трассаларда жол қауіпсіздігі туралы мәселе қарастырылды. Министр Марат Ахметжановтың айтуынша, ең ауыр жол апаттары көбінесе қала сыртындағы трассаларда орын алады.
Автожолдарда қаза болу фактілері 69-пайызды құрайды.
- Жамбыл (91%),
- Солтүстік Қазақстан (88%),
- Жетісу (86%),
- Алматы (83%),
- Атырау (81%),
- Ақмола (80%),
- Түркістан (72%),
- Павлодар (70%),
- Қызылорда (70%)
Министрдің айтуынша, Жамбыл облысынан өтетін «Батыс Еуропа — Батыс Қытай», «Алматы – Ташкент», Атырау және Батыс Қазақстан облыстарынан өтетін «Орал-Атырау» автожолдарындағы жағдай өте қиын. Осы облыстардағы қаза болу фактілерінің 64%-ы дәл осы учаскілерде орын алған. Негізгі себептер – қарсы жүріс бағытына шығу және жылдамдықты арттыру.
Жыл сайын елімізде 13 мың жол-көлік оқиғасы тіркеледі. 2 мыңнан астам адам қаза тауып, 18 мың адам жарақат алып отырады.
Жаз мезгілінде «Алматы-Екатеринбург» автожолының Жамбыл мен Қарағанды шекарасындағы учаскесінде апаттан 21 адам қаза тапты. Тек өткен демалыс күндері 70-тен астам оқиға тіркеліп, 21 адам қаза тауып, 84 адам жарақат алды.
Қала сыртындағы жолдардың қауіпсіздігіне – жол бойындағы инфрақұрылым әсер етеді. Өкінішке орай, жол бойында кэмпингтер, демалыс орындары, тамақтану пункттері көбінесе жоқ. Осыған байланысты, жүргізушілер көлікті ұйқысыз және демалыссыз басқаруға мәжбүр. Осылайша, олар өзін де, өзгені де қауіпке тігеді,
деді Марат Ахметжанов.
