Вудсайд қаласында АҚШ пен ҚХР делегациялары арасында жабық есік жағдайында өткен төрт сағаттық келіссөзде Джо Байден мен Си Цзиньпин қандай мәселелерді талқылағаны белгілі болды, деп хабарлайды Kazinform.
Тараптар негізгі мәселелердің бірі – әскери ведомстволар арасындағы байланысты жаңғырту бойынша келісімге келді. Бұл механизм қателіктер мен байқаусыздар әскери қақтығыстың шығып кетуіне жол бермеуі керек.
Екі ел 2022 жылдың тамызында АҚШ-тың Өкілдер палатасының спикері Нэнси Пелоси Тайваньға барғаннан кейін үзілген байланысты қалпына келтіріп жатыр.
Сондай-ақ фентанил есірткісінің заңсыз таралуымен күресуде тараптардың көзқарасы ортақ. Олар фентанилге арналған прекурсор өндіретін нақты бір компанияларға ықпал етіп, олардың санын қысқарту жоспары бойынша жұмыс істейді. Жыл сайын есірткінің осы түрінен он мыңдаған америкалық қаза табады.
Сонымен қатар тараптар жасанды интеллект пен климат мәселелерімен бірігіп жұмыс істеуге келісті.
Күн тәртібіндегі күрделі мәселе – Тайвань болды. Қытай көшбасшысы Америка-Қытай қарым-қатынасында Тайвань үнемі «ең маңызды әрі нәзік мәселе» болғанын атап өтті. Си Цзиньпин АҚШ-ты Тайваньді қарумен жабдықтауды тоқтатып, «Қытайдың бейбіт жолмен бірігуін» қолдауға шақырды.
Ал америкалық тарап Қытайдан Тайваньда 2024 жылдың қаңтарында өтетін сайлау алдындағы процеске құрметпен қарауды сұрады.
Сонымен қатар Джо Байден ұсталған АҚШ азаматтарына, адам құқықтары мен «Оңтүстік Қытай теңізіндегі мәжбүрлі іс-қимылға» қатысты Қытай әрекетіне алаңдап отырғанын жеткізді.
Қытай көшбасшысы Си Цзиньпин Құрама Штаттарды «Қытайды басып тастауды немесе ұстап тұруды жоспарламауға» шақырды.
Құрама Штаттардан асып түсу немесе орнын басу Қытай жоспарында жоқ, сол себепті АҚШ-тың Қытайды басып тастау немесе ұстап тұруды жоспарламағаны абзал. Екі тарап та бір-бірінің принципі мен түпкі мақсатын түсінуі керек, алауыздық пен мәселе тудырмай, шекарадан өтпей, оның орнына жиірек диалог пен пікірталас өткізіп, келіспеушілік пен қайғылы оқиғаларға сабырмен қарау қажет,
деп мәлімдеді Си Цзиньпин.
АҚШ президенті Джо Байден мен Қытай төрағасы Си Цзиньпиннің Калифорниядағы кездесуі тік және екі басшы арасындағы пікірталасқа толы болған.
Тараптар өзара құрмет көрсету, бейбіт өмір сүру, байланысты сақтап тұру және қақтығысты болдырмау қажет екенін атап өтті.
Атлантикалық кеңестің Еуразиялық орталығының ғылыми қызметкері Марк Темницки (Mark Temnycky) кездесу жаһандық инфляция, әлемдік азық-түлік дағдарысы мен басқа да халықаралық мәселелерге қарсы күрес тәсілдерін іздеп жатқан кезде, шиеленіске толы тарихи сәтте өткенін айтты. Екі ел арасында бұған дейін түсініспеушілік болғанына қарамастан, әлем көшбасшылары екі ірі державаның қарым-қатынасын жақсартуға ниетті. Сонымен қатар сарапшы әлемдегі күрделі жанжалдарды шешуде АҚШ-қа Қытайдың ықпалы қажет екенін атап өтті.
Си Цзиньпин «Жер ғаламшары үлкен, екі ел де жетістікке жете алады» деп түйіндеді сөзін.
