Алматы облысы Еңбекшіқазақ ауданында дене шынықтыру пәнінің мұғалімі 8-сынып оқушысын кабинетіне шақырып алып тиіскен.
Оқиға Ават ауылындағы орта мектепте болған. 8-сынып оқушы, әдеттегідей сабақтан кейін воллейбол секциясына қалған, 53 жастағы мұғалім оны өз кабинетіне шақырып, жаман ниетін іске асырмақшы болған. Қасында бір қыз болған, олар бірге келген, бірақ мұғалім екінші қызды жаттығу залына қайтарып жіберіп, қызыммен жалғыз сөйлескісі келетінін айтыпты.
Сені неге жібергім келмейтінін білесің бе? Неге екенін өзім де білмеймін,
деп айта бастапты.
Қызды өзіне тартып, бетінен сүйе бастаған, кеудесін ұстапты. Ашық тұрған терезенің пердесін жауып тастап, екі қолын жейдесінің астына салған. Сол сәтті сыныптастары қызды дауыстып іздеген. «Мұны екеумізден басқа ешкім білмесін» деп қызды шығарып жіберіпті. Іздеген сыныптастары болмаса мұның арты ауыр зардапқа соқтырар еді.
Анасы бұл туралы «НемолчиКЗ» қорына толық баяндап берген. Анасының айтуынша қызы аяқ астынан өзгеріп, тұйық болып кеткен. Қосымшаға да барғысы келмеді дейді. Оның себебін сұрағанда, бар шындықты естіп, есеңгіреп қалғанын айтады. Мұғалімді жақсы танитындықтан, алғашқыда сене алмаған.
Алайда полицияға берген арыздан кейін ер адам ұсталған жоқ, оның орнына тергеушілер қыздан түнгі үшке дейін жауап алған. Мектепте бейнекамералар болса да, полиция видеоларды алмапты.
Дене шынықтыру пәнінің мұғалімі мектепте 13 жыл еңбек еткен. Жасы – 53-те. Мұғалім әлі күнге дейін қызметінен шеттетілген жоқ. Денсаулығына байланысты жұмысқа келмей жүр екен. Алматы облысы білім басқармасының мәлімдемесіне сүйенсек, денсаулығына байланысты демалыстағы мұғалімді уақытша босату заң бойынша мүмкін емес деп отыр.
Тым болмағанда, бұл жағдайға қатысты полиция іс қозғапты.
Аталған дерек ҚР ҚК 124-бабының 2-бөлімінде көзделген қылмыстық құқық бұзушылық белгілері бойынша Еңбекшіқазақ ауданының полициясында тіркелді. Сотқа дейінгі тергеу басталды, қажетті сараптамалар тағайындалды,
дейді Алматы облысы ПД ресми өкілі Ернар Сайділдин.
Айта кетейік, Қылмыстық кодекстің 124-бабының 2-бөлігі «Жас балаға қатысты ата-анасы, өгей әкесі, өгей шешесі, педагог не оны тәрбиелеу жөніндегі міндеттер Қазақстан Республикасының заңымен жүктелген өзге адам жасаған дәл сол іс-әрекет» бойынша белгілі бір лауазымдарды атқару немесе белгілі бір қызметпен айналысу құқығынан өмір бойына айыра отырып, он жылдан 15 жылға дейінгі мерзімге бас бостандығынан айыру түріндегі жаза көзделген.