«Астана» футбол клубы Тбилисиде «Динамоны» ұтып, Чемпиондар лигасының екінші іріктеу кезеңіне өтті. Отандастарымыз сырт алаңдағы қарымта ойында 2:1 есебімен жеңіске жетті, деп хабарлайды vesti.kz.
Бір апта бұрын «Астана Аренадағы» ойында командалар 1:1 есебімен тең тарқасқан.
Тбилисидегі қарымта ойынды алаң иелері ширақ бастады. 22 минутта Усман Камара есеп ашып, алаң иелерін алға шығарды.
Екінші таймды да «Динамо» шабуылмен бастап, есепті еселеуге аз қалды. 50 минутта Абзал Бейсебеков алға ұмтылып, таразы басын теңестірді. Араға бір минут сала Дембо Дарбо есепте елордалық команданы алға шығара білді. Оның асқан шеберлікпен тепкен добын Гиорги Лория қайтарғанмен, доп қақпа торында тулады. Осылайша Григорий Бабаян шәкірттері камбэк жасай білді.