Журналист Диас Нұрақынның пікірінше, қазір әлеуметтік желілерде бас мүфтиге қарсы ақпараттық соғыс жүріп жатыр. Жұрт «Наурызбай қажы Тағанұлы туған жерін жасырды, оқыған жерін өтірік айтыпты» деген қауесеттер айтылған видеолар тарап жатыр.
Наурызбай қажы Тәшкенттегі Имам Бухари атындағы ислам университетін тәмамдаған. Бірақ оқу орны Наурызбай Тағанұлы деген шәкіртіміз болған жоқ депті. Сондай-ақ мүфтидің туған жері Оңтүстік Қазақстан облысы деп көрсетілген. Ал, кей құжаттарда туған жері Өзбекстан деп тұр екен. Шын-өтірігін бас имам өзі ашып айтар. Егер расымен еліміздегі ең иманды кісі өтірік айтып, бізді алдаса біткен жеріміз осы,
деп жазды Диас Нұрақын.
Бірақ, Диас Нұрақын, елімізде дінді жаулық қылып, ел ішіне іріткі салушылар бой көтере бастағанын да айтады. Бұған орамал дауы, шеше деген сөзге қарсы «ұстаздың» ұстанымы, мерседесті мұсылмандар ойлап тапты деген алып-қашпа әңгімелердің таралуы дәлел.
Бұл елді іштен ірітудің төте жолы. Сондықтан әлеуметтік желіде таралған күмәнді зерттеу видеоға мүфтият өкілдері тыңғылықты жауап береді деп сенеміз. Пойыздың алдына түсіп алып жүгірмей, әліптің артын күтейік,
деп жазды журналист.