Түркістан облысында бес жасар қызды зорлап, оны өлтірген педофил өмір бойына бас бостандығынан айырылды. Оған химиялық кастрация жасалады, деп хабарлайды ZTB.kz
Сонымен қатар, сот баланың өліміне кінәлі күдіктіге 100 млн теңге көлемінде моральдық өтемақы төлеуге міндеттеді. Алайда сотталушының өзі аталған үкіммен келіспейтін көрінеді.
Естеріңізге сала кетейік, ағымдағы жылдың шілде айында Түркістан облысы Сарыағаш ауданының тұрғыны полицияға 5 жасар қызының жоғалып кеткені туралы өтініш білдірген болатын. Нәтижесінде зардап шеккен қыздың денесі ауыл тұрғындарының бірінің үйінің шатырынан табылған еді.
Белгілі болғандай, күдікті бұрын кісі өлтіргені үшін 10 жылға бас бостандығынан айырылып, ал мамыр айында ауылдасын балтамен ұрғаны үшін істі болған екен. Кейіннен сот оны бар болғаны үш жылға бас бостандығынан шектеген.
