Белгілі саясаткер Дос Көшім Қаңтар оқиғасы кезінде Алматыдағы әуежайды басып алды деп айыпталып, бірнеше жылға сотталған бесеуге қатысты пікір білдірді, деп хабарлайды Uaqyt.info.
«Әуежайды басып алу ісі» бойынша айыпталып, 4 жылға сотталған журналист Әйгерім Тілеужан, 8 жыл арқалап кеткен Қалас Нұрпейісов, Нұрлан Дәлібаев, Ермұхамет Шилібаев, Жанайдар Кәрменовтерге шығарылған сот үкімі қоғамда қызу талқыланып жатыр.
Әлеуметтік желіде «Жаңа Қазақстан» сотының әділетсіз екенін айтып, жазып жатқандар көп. Бірақ саясаткер Дос Көшім одан келіп-кетер пайда жоқ дейді. Оның айтуынша, қоғамның шулап-шулап қоятынына биліктің еті әбден үйреніп кеткен.
Биліктің мұндай қатыгездігіне, іс-әрекетіне етіміз үйреніп кетті ғой. Басқаларға сабақ болуы үшін, міндетті түрде билікке қарсы шыққандарды жазалайтын жүйе сол күйі тұр. Ешнәрсе өзгерген жоқ.
Бұған дейінгі Жаңаөзен бар, басқа да жағдайлар бар, бұл соның жалғасы. Қазір әлеуметтік желіде бесеудің сотына қатысты түрлі пікір жазылып жатыр ғой. Бірақ оған құлақ асатын билікті көріп тұрғаным жоқ. Шулап-шулап қояды. Егер осы мәселені билік саяси тәсіл ретінде пайдаланғысы келсе, рақымшылық жасау арқылы өздеріне ұпай жинауы мүмкін. Алайда, жүйе өзгермей ешнәрсе өзгермейді.
Жүйені өзгерту деген – телефон шұқылап, пікіріңді әлеуметтік желі парақшаларында жазу емес. Жүйені өзгерту үшін саяси ұйым ба, партия құрылуы қажет. Бірақ қазіргі уақытта мен қоғамнан ондай қимылды көріп тұрғаным жоқ. Барлары ыдырап жатыр. Мен үшін ең өкінішті тұсы осы,
деді Дос Көшім.