2022 жылдың қаңтар-тамыз айларының аралығында ҚР Ішкі істер министрлігінің 199 қызметкері қылмыстық құқық бұзушылық жасаған.

Ranking.kz сайтының мәліметіне сүйенсек, олардың ішінде 149 полиция қызметкері ауыр қылмыстық құқық бұзушылық жасаған. Ауырлығы төмен құқық бұзушылықтарды – 22 қызметкер, ауырлығы орташа – 25 қызметкер, аса ауыр – 1 қызметкер жасады. Ал былтыр осы кезеңде ҚР ІІМ-нің 228 қызметкері қылмыстық құқық бұзушылықтарға барған.

Құқық бұзушылықтардың ең көп бөлігі Алматы қаласында болған (25 адам). Одан кейінгі орында Ақтөбе (19 адам, жылына 72,7%), Алматы (17 адам, 54,5%) және Солтүстік Қазақстан (17 адам, жылдық өсім-2,4 есе) облыстары тұр.

 ІІМ қызметкерлерінің ішінде қылмыстық құқық бұзушылықты жасау фактісі ең аз өңір ретінде Шығыс Қазақстан облысы тіркелді. Атырау және Жамбыл облысында полицейлердің қылмыс жасауы азайған.

ІМ қызметкерлері арасындағы құқық бұзушылардың жартысы мемлекеттік қызмет пен мемлекеттік басқару мүдделеріне қарсы сыбайлас жемқорлық және өзге де қылмыстық құқық бұзушылықтарға қатысты болып отыр. Бұл саладағылар көбіне, пара алып, билікті немесе лауазымын асыра пайдаланған. Оған қоса, алаяқтық, ұрлық және бөтеннің сеніп тапсырылған мүлкін иемдену немесе жымқыру  деректері де жиі кездеседі. Полицейлер биыл қаңтар-тамыз аралығында 12 адамды азаптаған.

Еске салсақ, қаңтар оқиғасынан кейін отандық бұқаралық ақпарат құралдарында және әлеуметтік желілерде полицейлердің адамдарды жазықсыз азаптағаны, «үтік басқаны» туралы фото-видеолар қаптап кеткен болатын.