Еліміздегі ет одағының болжауына сүйенсек, еттің бағасы тағы да қымбаттамақ, деп хабарлайды Global News 31 арнаның жаңалықтар қызметіне сілтеме жасап.
Қазірдің өзінде сиыр етінің бір келісі шамамен 4 мың теңге тұрады. Бұл бағалар әлі де өсуі мүмкін.
Қазақстан ет тұтыну бойынша әлемде небәрі 49-шы орында.
Сарапшылардың пікірінше, бағаның өсуі делдалдардың кесірінен болып отыр. Себебі олар кейде бағаны 50%-ға дейін көтереді. Нәтижесінде қарапайым сатушылар да шығынға батпас үшін үстеме бағамен сатуға мәжбүр.
Адамдар көбінесе арзанырағын сатып алады. Мысалы, төс еті, қабырғалар деген секілді. Енді баға көтеріліп жатса, біз де аздап өсіреміз,
деді сатушы Гүлжан.
Біз Қазақстанды сиыр етімен толық қамтамасыз ете аламыз. Импорт та келіп жатқандықтан бағаға әсер етеді,
деді Қазақстан ет одағының атқарушы директоры Асқар Жұбатыров.
Күзге арналған болжамдар бойынша арпаның бағасы көтеріліп, ірі ет инвесторлары тапшы болмақ, отандық өнім бұрынғы деңгейінде қалып, теңге әлсірейді. Сарапшылардың пікірінше, мұның бәрі алдағы айларда шығынның өсуіне әкеледі.
