Алматы тұрғыны 1-сыныптағы баласының зорланғанын мәлімдеді.
Жекеменшік мектепте оқитын баласының зорланғанын анасы әлеуметтік желіде жазды.
12 қыркүйек күні ұлым мектептен шалбары жыртылып келді. Келесі күні оны тігейін деп отырғанымда, көзім ақ дақтарды шалып қалды. Сол кезде баламның зорлық-зомбылыққа ұшырағанын түсіндім, жанымда үлкен қызым болған. Екеуміз полиция шақырдық,
дейді әйел.
Айтуынша, ұлы не болғанын айтпаған, бірақ оның психологиялық жағдайы 15 қыркүйектен бастап қатты нашарлаған. Ұйқысы бұзылып, қорқынышты түстер көріп, агрессияға жиі берілетін болған. Қазір онымен психолог және психотерапевт жұмыс істеп жатыр.
Алматы қалалық Полиция департаменті бұл дерек бойынша тиісті сараптамалар тағайындалғанын хабарлады.
Қылмыстық іс Бостандық ауданы полиция басқармасында ҚР ҚК-нің 121-бабы 3-бөлігі бойынша тіркелді. Істің объективті мән-жайларын анықтауға бағытталған тергеу шараларының кешені жүргізілуде. Тергеу барысы бақылауда,
деді Алматы қалалық Полиция департаменті бастығының бірінші орынбасары полковнигі Нұрлан Алмасбеков.
ҚР Қылмысты-процестік кодексінің 201 бабына сәйкес өзге ақпарат тергеу мүддесіне орай жария етілмеді.
Бұл ретте «Немолчи» қорының басшысы Дина Таңсәрі арада 2 апта өтсе де, полиция қызметкерлері тергеу жұмыстарымен асықпайтынын жазды.
Зорлыққа ұшыраған баланың анасы тек 13 қыркүйек күні қорға жүгінген. Қоғамға жайып салғысы келмеген. Енді сұмдық жайтты бүкіл ел білді. Видео әлеуметтік желіде таралып кетті. Дина Таңсәрі Бас прокуратура мен балалардың құқығын қорғау органдарын тергеу жұмыстарына белсенді ат салысып, бақылауға алуларын сұрады.
