Орталық коммуникациялар қызметінде өткен брифингте ҚР ІІМ Әкімшілік полиция комитеті төрағасының орынбасары Жандос Мұраталиев жол қозғалысы ережелерін бұзғаны үшін автокөлік жүргізушілерін де, жаяу жүргіншілерді де қатаңдату шаралары туралы айтты.
ҚР Ішкі істер министрлігінің өкілі қатаңдату бөлігінде биыл ғана Әкімшілік кодекстің сегіз бабына өзгерістер енгізілгенін айтты.
Баптарды қатайттық. Бұл, ең алдымен, жалған нөмірмен, нөмірсіз көлік жүргізуге, сондай-ақ жазатайым оқиғаларға әкелетін жағдайларға арналған. Алдағы уақытта, мәселен, жүргізуші бір жыл ішінде жол ережесін бес реттен артық бұзса, 50 пайыздық жеңілдікті алып тастаймыз. Себебі айыппұл оны тәртіпке салмайды екен,
деді Жандос Мұраталиев.
Жол қозғалысы ережесін бұзған жаяу жүргіншілерге де осындай шара қолдану ұсынылып отыр. Оның айтуынша, қазір Астана, Алматы сияқты қалаларда, облыстарда жаяу жүргіншілердің көшеден өтуіне барлық жағдай жасалған. Дегенмен, 50 метр жерде жерүсті немесе жерасты өткелі болса да, жолды көрінген жерден кесіп өтетін жаяу жүргіншілер әлі де бар.
Бұл жағдайда 2 АЕК көлемінде айыппұл салуымыз мүмкін. Жүргізушілерге қатысты да шара қолданатын шығармыз – егер жаяу жүргінші жолды белгіленбеген жерден бірінші рет кесіп өтсе, оған ескертіледі, екінші жағдайда оған әкімшілік айыппұл салынады, үшінші жағдайда айыппұл төлеуге 50% жеңілдік бермейтін шаралар қолданылады,
деді Жандос Мұраталиев.
Мұраталиев тиісті түзетулердің парламент депутаттарының қарауына жіберілгенін айтты. Оның пікірінше, жолдардағы тәртіпті тек әкімшілік шаралар ғана қалпына келтіре алады.
Сонымен қатар, комитет басшысының орынбасары қазір Сауда министрлігі скутерлер үшін әзірленген стандарт негізінде «Жол қозғалысы туралы» заңға және жол қозғалысы ережелеріне өзгерістер енгізіліп жатқанын қосты.
Содан кейін скутерлерге де әкімшілік айыппұл қолданылады. Әзірге олар «көлік жүргізушісі» ретінде емес, «жол қозғалысына қатысушылар» ретінде жазаланады.