Шамамен 30 минуттан кейін оның кенеттен қайтыс болғаны жарияланып, концерт тоқтатылды.
«Ирина Кайратовна» тобының жас мобилографы Астанадағы концерт кезінде кенеттен қайтыс болды. Жас жігіт топтың өнер көрсетуі алдында көрермендерді қыздырып жатқан диджейді түсіріп жатқан, кенет есінен танып құлап қалған. Көмекшілер сахнаға тез жүгіріп шығып, көмек көрсетуге тырысты, содан кейін оны сахнаның артына алып кетті. Шамамен 30 минуттан кейін оның кенеттен қайтыс болғаны жарияланып, концерт тоқтатылды.
Топ өкілдері сахнаға шығып, жанкүйерлерінен кешірім сұрап, концерттің тоқтатылатынын мәлімдеді.
Мобилографтың жасы небәрі – 21-де. Есімі – Шахназ Жылқайдаров.
Осыған байланысты Астанада 14-15 қазанға жоспарланған концерттер өткізілмейді. Шахназдың отбасына ИК командасы барынша қолдау, көмек көрсетеді.
Біз оның талантына және мейірімділігіне бас иеміз. Әрі есіміне құрмет ретінде әр концертімізде оны еске алатын боламыз,
деп жазды Ирина Кайратовна тобы өзінің парақшасында.
Астана қалалық қоғамдық денсаулық сақтау департаменті қаза тапқан 21 жастағы мобилографтың өлімі туралы пікір білдірді.
Ақпаратта атап өтілгендей, 2023 жылдың 14 қазанында сағат 20:23-те 103 нөміріне екінші санатты жедел жәрдем шақырту түскен. Жедел жәрдем бригадасы сағат 20:33-те жеткен, осы уақытқа дейін жасөспірімнің жағдайы анықталды. Ол есінен танып қалған күйде болған. Нәтижесінде дәрігерлер биологиялық өлім орын алғанын білді.