Мемлекет адамдар арасындағы жәй аударым мен кәсіпкерлік мақсаттағы аударымдардың аражігін ажырату үшін алдағы уақытта қазақстандықтардың мобильді аударымдарына жүйелі түрде мониторинг жүргізбек. Себебі, кәсіпкер салық төлеуден жалтармауы керек.
Сонымен, басты сұрақ – дәл қазір азаматтардың мобильді аударымдары тексеріліп жатыр ма? Жауап – жоқ, тексеріліп жатқан жоқ. Өткенде ғана еліміздің Қаржы министрі Ерұлан Жамаубаев осыған қатысты жауап берді, деп жазды Қаржылық Сауат арнасы.
Қазір халықтың басын қатырудың қажеті жоқ. Жұмыстар жоспарлы түрді 2025 жылға дейін жүргізіледі. Ешқандай тексерістер болмайды, халық пен бизнесті қанау тіпті ойда жоқ. Бұл – уәде. Керек мәліметті тиісті орган береді. Қосымша тексерістер болмайды, әлдекім жасайтын болса, жазасын алады.
Ерұлан Жамаубаев, ҚР Премьер-министрінің орынбасары – ҚР Қаржы министрі.
Мемлекеттік кірістер комитетінің ақпараты бойынша, қазақстандықтардың мобильді аударымдары кезең-кезеңімен бақылауға алынады. Мысалы, қазір 2022 жылдың қорытындысымен мемлекеттік қызметшілер мен олардың жұбайларына қатысты ақпарат екінші деңгейлі банктерден алынып жатыр.
2025 жылы жеке кәсіпкерлерге, заңды тұлғалардың басшылары мен құрылтайшыларына, сондай-ақ олардың жұбайларына қатысты осындай бақылау жүргізіледі. 2024 жылдың қорытындысымен.
Еліміздің қалған азаматтарына 2026 жылы бақылау жүргізіледі. 2025 жылдың қорытындысымен. Яғни, 2026 жылдың басында банктер Мемлекеттік кірістер комитетіне осындай азаматтардың ЖСН нөмірлері көрсетілген тізімді жібереді.
Егер, 1 адамның картасына ай сайын 100-ден астам аударым жасалса және ол үш ай қатарынан қайталанса, онда ол азаматтан есеп сұралады. Бақылау жүргізудегі басты критерийдің бірі – осы. Қазір осы санатқа сай келетін азаматтардың деректері жиналып жатыр.
Ал, жеке тұлғалардың аударымдарына келсек, мысалы, студентке ата-ананың көмегі, жақындарына қаржылық көмек, туған күн, бата түрінде жіберілген басқа да аударымдарға салық салынбайды деп хабарлайды Мемлекеттік кірістер комитеті.