Оқу-ағарту министрі Ғани Бейсембаев биылғы оқу жылының мерзімі осы аптада белгілі болатынын айтты. Бұл туралы Stan.kz ақпарат агенттігі хабарлайды.
Министрдің айтуынша, оқу жылы мерзіміне қатысты сарапшылардың пікірі екіге бөлінген.
Оқу жылының мерзіміне қатысты министр ретінде шешім қабылдауым керек. Бірақ шешім алдымен балалардың мүддесіне сай болуы керек. Мен ортақ келісімге келу бойынша тапсырма бердім. Оқу мерзіміне қатысты пікір екіге жарылды. Біреулер 34 аптаны қолдаса, басқалары 36 апта болуы керек дейді. Мен өзім екі жақпен де кездестім. Бұл жерде мәселе кімдердің жеңетінінде емес. Бұл жерде алдымен балаларға білім беруде жағдай жасауымыз керек. Менің ойымша, жуырда аталған жайтқа қатысты нақты шешім қабылдаймыз. Осы аптада деп ойлаймын,
деді Ғани Бейсембаев Үкімет отырысынан кейін БАҚ өкілдерінің сауалына жауап бере отырып.
Министр ата-аналар талқылауға қатыса алмайтынын айтады.
Ата-аналар да бәрін біліп отырғаны дұрыс. Дегенмен қазақта бір сөз бар ғой, “Шымшық сойса да, қасапшы сойсын”. Шешімді сарапшылар қабылдауы тиіс,
дейді министр.
