Сочиде петерборлық коуч ұсталды, ол соңғы кездері шикі тағамдар тұтыну және күн сәулесінен нәр алуды насихаттап жүрген. Ол мұндай диетаға баласын да отырғызуға шешім қабылдады. Бала күн диетасына бір ай да шыдамай қайтыс болған.
«Фонтанка» басылымының жазуынша, белгілі болғандай, 8 наурызда түсте Сочи балалар ауруханасында бір ай бұрын туған баланың қайтыс болғаны анықталды. Баланың мәйіті сараптамаға жіберілді. Сонымен бірге, нәресте дәрігерлердің көмегінсіз дүниеге келгені және тіркелмегені белгілі болды. Соңғы аптада нәресте әрең дем алып, тамақтан бас тартқан. Алайда ата-анасы дәрігерлерді шақырмаған. Тек 8 наурыз күні таңертең ерлі-зайыптылар ауруханаға баруды шешкен. Ұлдарын Ана мен баланы қорғау орталығына алып келгенімен, реаниматолог баланы құтқару мүмкін емес екенін айтқан.
Сәбидің 34 жастағы анасы қазір абайсызда қазаға ұшырату қылмыстық іс бойынша күдікті ретінде ешқайда кетпеу туралы тілхатпен жүр. 43 жастағы әкесі полиция қызметкерлеріне бағынбағаны үшін 10 тәулікке қамауға алынды. Максим Лютый блогосферада өзінің өмір салтымен танымал. Ол өзін шикі тағамдар тұтынушы және күн сәулесінен нәр алушы деп атайды, ақшаға адамдарға «тазаруға және сауығуға» көмектеседі. Әлеуметтік желілердегі бейнеге қарағанда оның қызметіне боксшы Александр Поветкин жүгінген. Қайтыс болған баланың әкесі Санкт-Петербургтен, бірақ соңғы жылдары, профильге сәйкес, Ресейдің оңтүстігінде өмір сүрді. 1990 жылдары ер адам есірткі үшін сотталған.