Сол баяғы алдау, қорқыту, ақша бопсалау.
Оқиға Шымкент қаласында болған. Түн ішінде қоңырау шалған белгісіз біреу зейнеткерге өзін Полиция департаментінің тергеушісі деп таныстырады. Әдеттегіше, «қызың жол апатына себеп болды, босату үшін ақша төлеу керек» дейді.
Сосын талап қойған: курьер келгенше телефон тұтқасын қоймауы керек. Сөйтіп, үйіне келген жігітке қария 900 мың теңгесі мен 500 долларын өз қолымен ұстатып жібереді…
Кейін жәбірленушінің туыстары полицияға болған жайды баяндап, «курьердің» жеке басы анықталады. 22 жастағы жергілікті тұрғын екен. Мобильді мессенджер арқылы түрлі нұсқаулар алып, сол бойынша әрекет етіп келген.
Рolisia.kz порталының хабарлауынша, ол алған ақшаның 90%-ын онлайн-жұмыс берушілердің шотына аударып, қалған соманы жалақы ретінде ұстап қалып отырған.
Қаржылық сауат арнасы үйдегі үлкендерге үнемі ескертіп жүріңіздер деп кеңес береді. Өзіңіз де сақ болыңыз! Телефон шалғанның бәріне сене беруге болмайды.
Алаяқтардың қолында қазақстандықтар туралы көп дерек бар сияқты. Әйтпесе, «жертваның» нақты қызы, не ұлы барын, олардың көлік айдайтынын қайдан біледі?