Байден әкімшілігінің бағалауы бойынша, желтоқсаннан бері Ресей Украинада 20 мың әскери қызметкерінен айырылды, тағы 80 мыңы жараланды. Бұл туралы Ақ үйдегі брифингте АҚШ Ұлттық Қауіпсіздік кеңесінің өкілі Джон Кирби жақында жария етілген ақпаратқа сілтеме жасап хабарлады. Ол қаза тапқандардың жартысынан көбі «Вагнер» жеке әскери компаниясының әскери қызметшілері екенін атап өтті.
Кирбидің айтуынша, Ресейдің Бахмуттағы шабуылы тоқтап, сәтсіздікке ұшырады. «Ресей үшін Бахмут қаласы арқылы Шығыс Донбассқа шабуылы өте қымбатқа түсті», — деді ол.
Джон Кирби Украинаның шығындары туралы сұраққа жауап беруден бас тартты. Оның айтуынша, Ақ үй Украина мен оның әскерінің жағдайын қиындататын ақпаратты жарияламайды.