Мемлекет басшысының баспасөз хатшысы Руслан Желдібай бала 18 жасқа толғанша жинақтаушы есепшотында қанша сома жиналатынын айтты.
Президенттің бастамасымен Балалар жылының аясында «Ұлттық қор – балаларға» атты жаңа бағдарлама іске қосылады. Ол бойынша 2024 жылдан бастап Ұлттық қордың жыл сайынғы инвестициялық табысының 50 пайызы балалар 18 жасқа толғанға дейін олардың арнаулы жинақтаушы есепшотына аударылады.
Жинақталған қаржы балалар кәмелет жасына толғаннан кейін олардың баспана немесе білім алуына жұмсалады.
Үкімет пен Ұлттық банктің есебі бойынша елімізде жыл сайын 400 мың сәби дүниеге келеді. Әр бала 18 жасқа толғанша олардың есепшотында кемі 3 мың АҚШ долларына тең қаражат жиналады,
деп Руслан Желдібай Facebook-парақшасына жазды.
Айта кетейік, мемлекет басшысы жолдауында енді мемлекет әр баланың жинақтаушы есепшоты болатынын айтқан еді.