Ең танымал таулардың бірі 3010 метр биіктікте орналасқан. 2007 жылға дейін бұл шың Пионерский деп аталып келді. Кейін белгілі Гималайдың қар барысы есімі берілді.
Анатолий Букреев өзін әлем азаматы деп атайтын. Онысы дұрыс та шығар: Оралда туып, Қазақстанда тұрды, Америкада жаттықты, бірақ дегенмен де көп уақытын Непал тауларында өткізді.
1997-1998 жылдың қысында Букреев теңіз деңгейінен 8078 метр биіктіктегі Аннапурна шыңына шығуды жоспарлаған. Ол оны бағындыруға итальяндық альпинист Симоне Моромен бірге барған. Олармен бірге көтерілудің барлық кезеңдерін бейнекамераға мұқият түсірген қазақстандық оператор Дмитрий Соболев келді.
1997 жылы 25 желтоқсанда экспедиция мүшелері маршрутты өңдеу мақсатында кезекті сапарға шықты. Үшеуі де қажетті жұмыстарды аяқтап, базалық лагерьге демалуға оралды. Түсу кезінде олардың үстіне қар карнизі құлап, үлкен күштің кенеттен қар көшкінін тудырды. Әп-сәтте ол экспедицияның үш мүшесін де сыпырып әкетті. Топта соңғы болған итальяндық Моро аман қалды. Қар көшкіні оны 800 метрдей сүйреп әкетіп, ол ауыр жарақат алған, бірақ көмек шақыру үшін базалық лагерьге өз бетімен жетіп үлгерді. Соболев пен Букреев сол жерде қайтыс болды.
2023 жылы 16 қаңтарда Букреевтің жасы 65-ке толар еді. Анатолий Николаевич – шыңға өрмелеуші альпинист, спортқа еңбегі сіңген шебер, «Қар барысы» атағының иегері, ғаламшарымыздың 14 тауының 11-ін және Эвересттің өзін төрт мәрте бағындырған! Ол әлемге әйгілі аңыз адам, оның Эверестке шығу сапарларының бірі Балтазар Кормакураның голливудтық «Эверест» фильмінің шығуына сеп болды.
Анатолий Букреев – «Жеке ерлігі үшін» орденінің кавалері (1989), өз өміріне төнген қауіпке қарамастан, тауда адамдарды құтқарған альпинистерге табысталатын Америка альпклубының ең жоғарғы марапаты – Дэвид Соулс медаліне лайық деп танылған (1997), дүниеден озғаннан кейін қазақстандық «Ерлігі үшін» медалімен марапатталған (1998).
Тау – менің өз амбициямды қанағаттандыратын стадион емес, олар – менің дініме құлшылық ететін ғибадатхана.
Маршрут Бутаков шатқалынан басталады. Асфальт төселген жолдың соңына дейін көлікпен жетуге болады. Әрі қарай Бутаков сарқырамасына апаратын жолмен жоғары қарай жүресіз. 1 км кейін «Букреев шыңы» белгісіне тап боласыз.
Ол сол жаққа апарады. Өзенді кешіп өтіп, шатқалға жетесіз, әрі қарай орман асуы шығады. Шыңға жету жолы жаз айларында ерекше көрініс береді. Жарқырап өсіп тұрған жасыл ағаштар ыстық күннен қорғайды. 9 км бағындырып, 1000 метр биіктікке көтерліген соң үстіртке тап боласыз. Үстірттің ортасында кішкене жартас болғандықтан, бұл жерді «Үміт шыңы» деп атап кеткен. Үстірттен шың айқын көрінеді.
Шамамен 1 сағаттан соң шыңға да жетесіз. Жол жотаның бойында болғандықтан, қатты жел соғып тұрады. Сондықтан өзіңізбен жылы киім ала шыққаныңыз жөн.
Букреев шыңының етегінде кішкене қорғаныш үйшігі орналасқан. Оның ішінде екі төсек пен шәйнек бар. Суық күнде қалып қойсаңыз, жылынып, түнеп те шығуға болады.
Таудың шыңында қоңырау орнатылған. Дәстүр бойынша, қоңырауды ұрып, дыбыс шығару – тауға шығатын барлық альпинистер мен туристерге құрмет көрсету болып табылады.
Екінші рет шығуым. Бұл мен сияқты енді бастап жүрген адамға оңай болған жоқ. Бар жоғы 20 км бағындырдық. Шыңдарды бағындыру үшін ең алдымен ниет керек, сосын толық жабдық керек. Ыңғайлы рюкзакқа күннен қорғайтын кремнен бастап, ішетін суыңды міндетті түрде алу керек. Тауға оп-оңай барып келемін деп ойлау- қате. Биіктікке көтерілу мен түсу кезінде құлап, жарақат алмас үшін арнайы табаны қатты аяқ киім киген дұрыс. Аяққа салмақ түспес үшін, қолдарыңызға таяқша алу керек, ол ең алдымен тірек болады. Кішкене қуаттанып алу үшін жейтін тәтті немесе бутер сияқты жеңіл тамақ алу керек.
Көтерілу оңай емес. Таңның атысымен шыңсаңыз, кешке таудан түсесіз. Жазда шыңға дейін күн ыстық болады, ал дәл сол шыңда тұрғанда желдің суығы соншалықты, миыңнан өтіп кетердей әсер береді.
2023 жылдың 18 қаңтарында Медеу шатқалында Анатолий Букреевтің мүсіні орнатылды. Мүсінде альпинист тынығып отырған қалыпта бейнеленген. Бұл – жаңа шыңды бағындырар алдындағы шағын үзіліс, альпинист қазір ғана жүріп өткен жолына көз тастап, жартастың шығыңқы бетінде отыр. Қолымен мұз шапқышына сүйенген.
